Mun Cinye Dukiyar Gadonmu A Abinci Ba Tare Da Sauran Magada Ba, Ya Za A Yi Kenan?

𝐓𝐀𝐌𝐁𝐀𝐘𝐀❓

Assalamu alaikum. Malam ni ce mahaifina ya rasu ya bar ni da ƙannena, ni ce babba ya bar kuɗi (N170, 000) sai na ɗauki wannan kuɗin na fara kasuwanci da shi ina musu cefane yau da gobe sai cefanen ya fi ƙarfin kuɗin, sai kuɗin suka ƙare, daga cikin ƙannen nawa akwai waɗanda ba sa gidan ba da su ake cin abincin ba, to yanzu zan biya kuɗin ne ko ba zan biya ba, kuma ya hukuncin waɗanda ba sa gidan? Na gode.

𝐀𝐌𝐒𝐀❗️

Wa'alaikumus salam, ‘yar uwa a cikin Alƙur'ani aya ta 5 da ke suratun Nisá'i, Allah maɗaukakin Sarki ya bayyana cewa kada a ba marayun da ba su hankalta ba dukiyar gadonsu da ake kula masu da ita, amma ya ba da umurnin za a iya ciyar da su, a tufatar da su daga wannan dukiya tasu, sannan kuma a riƙa faɗa masu magana mai daɗi. Wato sai ya zama kenan ba laifi ne ba don mai kula da maraya ya ciyar da shi marayar daga dukiyarsa, idan kuma da mutum zai yi sadaka ya ciyar da marayar a dukiyarsa ta ƙashin kansa ba tare da waiwayar dukiyar marayar ba, to hakan ya yi kyau.

To sai ya zama kenan abin da kika yi na kasuwanci da dukiyar gadon naku, da yin cefanen abincinku a ciki ba laifi ba ne matuƙar an shirya gaskiya, amma inda matsalar take shi ne da har kika bari kuɗin nan suka ƙare a cefane ba tare da cire wa sauran marayun da ba sa gidan haƙƙinsu a cikin wannan kuɗi ba, a nan ne inda matsalar take, don haka bisa shawara abin da ya kamata ki yi yanzu shi ne;

Ki nemi malami ko alƙalin da ke da ilimin rabon gado, ya lissafa haƙƙin kowa daga cikin magadan nan, bayan an gama lissafawa, sai ki nemo dai-dai haƙƙin waɗancan ‘yan uwa naku magada da ba a ci abincin nan da su ba, sai ki nemo dai-dai abin da aka ce shi ne rabonsu a N170, 000 ɗin ki ba su, in Allah ya so yin hakan zai fitar da ke daga shubha. Ko kuma idan duk sun mallaki hankalin kansu, sai ki kira su ki sanar da su, idan Allah ya sa sun ce ba komai sun yafe to shi kenan, amma idan ya kasance ba su gama hankali ba, to ki bi wancan mataki na farko na nemo masu dai-dai rabonsu, hakan ya fi alheri.

Allah S.W.T ne mafi sani.

Jamilu Ibrahim Sarki, Zaria.

Ga Masu Buƙatar Shiga Wannan Group Zaku iya bi ta Links ɗin mu...

𝐖𝐇𝐀𝐓𝐒𝐀𝐏𝐏👇

https://chat.whatsapp.com/FBuwMyVjc2sGOEGLm0W7ed

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.