Yaushe ne lokacin sallar wuturi ke ƙarewa?

𝐓𝐀𝐌𝐁𝐀𝐘𝐀❓

Assalamu alaikum malam. Na yi sallar Isha'i sai na yi shafa'i ban yi wutiri ba ina son in farka zuwa Ƙarfe 2:am in yi nafila sannan in rufe da wutiri sai bacci ya dauke ni ban farka ba sai da Asuba, shi ne aka ce min sai na yi wutiri sannan in yi Asuba, kuma lokacin an tsayar da sallah. Shin malam haka ne?

𝐀𝐌𝐒𝐀❗️

Wa'alaikumus salam, malamai sun yi ittifaƙi cewa lokacin sallar Wuturi yana farawa 'bayan sallar Isha'i zuwa ɓullowar Alfijir' ne, saboda dalilai da dama da suka tabbata daga Manzon Allah ﷺ da suka haɗa da hadisin da Abu Nadhrata ya ruwaito daga Abu Sa'eed cewa: Manzon Allah ﷺ ya ce: "Ku yi Wuturi kafin ku yi Asubahi". Muslim (754).

Amma malaman sun yi saɓani game da halascin yin sallar Wuturi bayan ɓullowar Alfijir kafin a yi sallar Asubahi, daga cikinsu akwai waɗanda suka hana yin hakan, daga cikinsu kuma da waɗanda suke ganin halascin yin Wuturi bayan ɓullowar Alfijir matuƙar ba a yi Asubahi ba.

Daga cikin waɗanda suka hana akwai Abu Yusuf da Muhammad bn Hassan abokan Abu Haneefa, da Sufyan ATthauriy. Waɗanda suke ganin ya halasta a yi Wuturu bayan ketowar Alfijir kafin tsayar da sallar Asubahi kuwa su ne Imam Asshafi'iy, da Imam Malik, da Imam Ahmad.

Abin da ya sa suka yi saɓani game da hakan shi ne, saboda an sami wasu dalilai daga ayyukan Sahabbai cewa sun yi sallar Wuturi bayan Alfijir ya keto kafin a tsayar da sallar Asubahi, sai dai duk da haka, ayyukan na Sahabbai ya nuna ba ya halasta a yi sallar Wutiri bayan sallar Asubahi kamar yadda wancan hadisi na Abu Nadhrata da wasu hadisan suka tabbatar. Amma kuma yin Wuturi ɗin bayan ɓullowar Alfijir kafin a yi Asubahi yana matsayin ƙala'i ne ba a matsayin ada'i ba.

Duba littafin Ibnu Rushdi, BIDAAYATUL MUJTAHID WA NIHAAYATUL MUƘTASWID (1/212),  don neman ƙarin bayani.

Saboda haka ƴar uwa idan kin lura za ki ga cewa lokacin sallar Wuturi yana farawa ne bayan Isha'i zuwa ketowar Alfijir, idan mutum bai sami damar yi ba a wannan lokaci zai iya yin ta a bayan ɓullowar Alfijir ɗin kafin a yi Asubahi a bisa ɗaya daga fahimtar malamai.

Ke nan wannan ya nuna matuƙar an fara sallar Asubahi to babu maganar yin sallar Wuturi, sai a haƙura a tara a gaba, tun da ke ma kin ce har an tsayar da sallah, don haka maganar da aka faɗa maki cewa sai kin yi wuturi kafin ki yi Asubahi wannan zai yiwu ne idan har ba a riga an shiga sallar Asubahi ba, idan ko an fara Asubahi, to babu wannan magana, saboda akwai ma hadisin da ya ce, idan aka tsayar da sallah, to babu wata sallah sai ta farillah, kamar yadda Muslim ya ruwaito a hadisi mai lamba: 710.

Allah S.W.T ne mafi sani.

Jamilu Ibrahim Sarki, Zaria.

𝐖𝐇𝐀𝐓𝐒𝐀𝐏𝐏👇

https://chat.whatsapp.com/Du5LNx31U9hDi6RƘbbrzgW

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.