Kukuma

Yakasai, S. A. & Sani, A-U. (2021). Diwanin Waƙoƙin Aminu Ladan Abubakar (ALA). Kaduna: Amal Printing & Publishing Nigerian LTD. ISBN: 978-978-57624-9-0.

Riga ta aro malam ba ta zama walki ba,

Wando na aro malam ba zai zama walki ba.

 

Dole katara malam sai ka yi abin kanka,

Kai ka zama hankaka ba ka koyin kanka.

 

Sai mun riƙe al'ada sannan a ga kimarmu,

Sai mun riƙi al'da ne ma kai banyenmu.

 

In ba mu da al'ada me za mu gwada namu?

Busa mani kukuma don zan yi ta'adunmu.

 

Adabinku madubinku in kun ci gashin kanku,

Sa'in da kuke kira ai kun ci gashin kanku,

Ku ke da diga garma har ma da fatanyunku,

Kun kera kurada har da gizagon saranku.

 

Zangon da muke ƙira,

Loton da muke saƙa,

Sa'in da muke jima,

Da can da muke noma,

Kiwo da fataucinmu,

Mun kau da zaman banza,

Mun kere sa'a malam.

Ba mai taɓa dangarmu.

 

Da barin al'adunmu lalacewar ta kai an ɓata kamar Hausa,

Yau Hausawa babu kama da rigarsa ba ka gane Hausa,

Mun zamma alankosa ba ma kishin kanmu barci tamkar kasa,

Riga ta aro mun sa kullum sai sa-in-sa nauyinmu kamar tasa.