Yakasai, S. A. & Sani, A-U. (2021). Diwanin Waƙoƙin Aminu Ladan Abubakar (ALA). Kaduna: Amal Printing & Publishing Nigerian LTD. ISBN: 978-978-57624-9-0.
Magaji PPRO,
Magaji Musa É—an majiya baba baba PPRO,
Uban maza É—iban Garko,
Kama a nan har ma Koko,
ÆŠiya maza suke sakko,
Masu nunin fifiko,
Uban maza fa yana dako.
Baba tsarin taurari,
Na gano ka sahun nari,
Bakin wuta na kashe sharri,
Kasanta doka mai tsari,
Magaji ka zamto khairi,
Magaji ko kuma annuri,
Tsanin hawa kan alkhairi,
Allah ya sada mu khairi.
Ubangijina Jabbaru
Abin yabona Sattaru
Ina ta goden alkhairu,
Ka sa na zamto mashakuru,
Saboda dubban alkhairu,
Na yi tsani da mubarru,
Mubasshirun kana naziru,
Nurulhuda sirrul sirru.
Ina yabo gun Baballo,
Cikin zumuÉ—i da hakilo,
Yabon ya janyo 'yan kallo,
Kamar ana wasan ƙwallo,
WaÉ—ansu don nuna hakilo,
Suna ta rauwa mai lilo,
Waɗansu don shauƙin kallo,
Suna dara ya na É—an dalo.
Magaji ka biya allonka,
A yanzu ka iya allonka,
A yanzu hadda ke binka,
A gobe satu ke kanka,
A É“angaren gogewarka,
Spacial duty naka,
Hagun zuwa ma damanka,
Magaji sai dai sambarka.
Abin da ke ban mamaki,
Idan kana sautin baki,
Kasantuwa taka kakaki,
Na rundinar masu kulaki,
Batunka na samin shauƙi,
A radio nika mamaki,
Da an ji an san ba sauƙi,
Su baba dodon shawaraki.
Abin da ke mani tasiri,
Da ka yi saƙon alkhairi,
Mutan gari ba sa ruri,
Majorati ba su burari,
Suna ta goden alkhairi,
Saboda ikon Jabbari,
Ya ba ka baiwa da sururi,
Allah ya kare duka sharri.
Idan Magaji yak kuta,
Ka ce wuya kashin ƙota,
Makangara za su wuyata,
Da masu halayyar wauta,
A nan sahu zai daidaita,
Na masu halayyar wauta,
Magaji É—an barni in huta,
Kukan wuya kashin ƙota.
Kwamantaka ko alharga,
Magaji mai horon tsabga,
Ga ‘yan daba koko ayaga,
WaÉ—anda ke É—aukar zuga,
Wuya tana filin daga,
Da masu wauta sun shirga,
Magaji mai siga-siga,
Da lalama ko kuma jibga.
A randa naj jeni ziyara baba a ofishin Fifi'ar'o,
Da ni da Rabi’u mai Æ™ara baba na kai shi gun fifi'ar'o,
Bayan da mun gama kai ƙara baba na kalli ofis fi'ar'o,
Ta ko’ina kambun girma nake gani na baba ne fifi'ar'o,
A nan na gano kakin nan baba ba duk mutum ke fi'ar'o.
Aminu ALA mai waƙa baba yake ta waƙar cancanta,
Na tashi in yaba halinka baba irin yabo don cancanta,
In kambama ka a sashenka baba da ka iya kuma ka huta,
Saboda ka biye allonka baba me za ya hanneka ka huta,
Aiki ka san bim umarni baba da an riƙe shi da an huta.
.jpeg "Daga Diwanin Waƙoƙin Aminu Ladan Abubakar (ALA)")
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.