Yakasai, S. A. & Sani, A-U. (2021). Diwanin Waƙoƙin Aminu Ladan Abubakar (ALA). Kaduna: Amal Printing & Publishing Nigerian LTD. ISBN: 978-978-57624-9-0.
Amshi
Rabbana kadamin da ka ɗora ni,
Ba wai da zane ba.
Rabbana ka hane mu ka munkari,
Ni jar masoyana.
Rabbana masanin sarari ɓoye, rani da damina,
Rabbana masanin sirrin ɓoye aljan da insana,
Rabbana masanin sharrin ɓoye ƙauye da birnina,
Rabbana ka hana mu ganin sharri ni har masoyana.
Rabbana ka tsare mu da yin shirka babba da ƙarama,
Ka hane mu dukan nau'in shirkar ɓoye muna nema,
Ka tsare mana imani Allah don annabin girma,
Ka hana mu halin homa Allah jiji da kai girma.
Rabbana ka tsare min imani kar nai bakar jewa,
Ka saka mini albarkar gawo toho da yaɗuwa,
Lokacin da bisashe ke fari domin rashin ruwa,
Sa'ilin da yake toho gawo kana da yaɗuwa.
Ka hana ni shiga shirgi Allah 'yan ribatar kowa,
Ka tsare ni a kiɗa mummuna hanya da gantsarwa,
Ka kiyaye Musulmi al'uma kar su yi bakar jewa,
Ka aza mu tafarkin alhairin da babu cutarwa.
Rabbana kogin zunubi Allah ya shanye duk kaina,
Na ɓace a cikin gulbi Allah kai ne ka ceto na,
Rabbana ka tsare mu da yin shirka ko ɗis!! A bakina,
Rabbana ka saka mu yi kyan ƙarshe ni har masoyana.
.jpeg "Daga Diwanin Waƙoƙin Aminu Ladan Abubakar (ALA)")
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.