Muna shukura ga Rabbal alamina
Da alherin da yai mana ba kaɗan ba.
Muna murna da mulkin Ingilishi
Zuwan da sukai ƙasarmu ba tai tsiya ba.
Zama zamaninsu ne aka zo da faifa
Kuɗi ba masu nauyaya aljihu ba.
Daɗa zarafinsu ne aka zo da jirgi
Ka je Makka ba da tashin hankali ba.
Sa'annan ga su Babur, ga su Mota
Da farko a da can ba mu san da su ba.
Izan tafiya ta faru ka nemi mota
Izan jirgi ba kui daidai da shi ba.
Izan kuwa babu Jirgi babu mota
Ka je da ƙafarsa ba keken tsiya ba.
Banni da Basukar ho, ɗan jidali
shaƙiyyi ba abin babba ya hau ba.
A Ɗanmahawayi nih hau sai ya bar ni
Tudun-Yakaji ban kawo gari ba.
Ya bar ni da jin jiki da zama a turba
Da ɗai ko juma'a ba a je da ni ba.
Kuɗi tirmis, na ba shi sule-da-sisi
keke bai mani rangwame ko da ɗari ba.
Na ce masa "Basukur riƙa sawwaƙewa"
Ya ce "Malam hala ba ka sanni ne ba".
Ina da tsiya biyar farkonsu fanca
Na kau buga bindiga ba mai wuta ba.
In babbake zuciya, in tafi da sawu
Cikin daji kamar ba a je da ni ba.
Muna tafiya kuma na fizge kaina
Mu faɗa kwazazzabo ni ban kula ba.
Ina da ciki ana ce mai kurumbo
Karambanin hawa ba ka saya ba.
Hanjina kaca mai kama riga
In fizgo mai hawa ni ban kula ba.
Tsiya na can mu je kan kadarko
Madaidaici in ce ba za mu hau ba.
In hau bisa kafaɗar bari na zauna
Kamar mahayin daɗai bai hauni shi ba.
Sukai ka'ida da Sale a kan kadarko
Sai yace "Haba Sale ba zan yadda kai ba.
Daɗai suka wantsala hakan kan ya ƙwace
Ashe ba Sale ne a cikin ruwa ba?
Ya bi shi ya bangaje ya buge yana ce
A zo a gani idan ban yada kai ba.
Malam Sale sai da ya tuɓe riga
Ya sa ka ga Sale har bai sha ruwa ba.
Ya tashi ya hau tudu keke ya bi shi
Da rigar Sale keke bai sako ba.
Su malam Sanda duk suka tarma keke
Da ban magana ya ce ba zai sako ba.
Ya ma rantse da jirgi har da mota
Ba za shi sako in ba a sa wuƙa ba.
Malam Sanda wai sun shirya da keke
Wai yana ƙaunarsa ba domin tsiya ba.
Ya ce haba malami kamarka
Ba zan iya yadda babban malami ba.
Izan dai za ka hauni ka tara riga
Da wando ba ka hau ni hawan isa ba.
Ya tashi hawa bai tattara ba
Ya fizgo malamin ba a jinjima ba.
Ya yasai nan da nan a tsakar gidansa
Cikin matansa tun ba a kai daɓe ba.
Yace Bari nai kure yashe ka malam
Dama ban kai ka bakin kasuwa ba.
Ba na son na yada mutum na kirki
Izan ba inda za ai dariya ba.
Da motsa ƙararrawarka da kama burki
Ba za su hana ni in jefar da kai ba.
Ya ce masa ba na ƙara hawanka keke
Ya ce masa ko adankiya ban kula ba.
Hawan da rashin hawan a gare ni ɗai ne
Ban ga abin da zai cutar dani ba.
Kamar tafiya ta sauri ko ta fizge
Ba ka je inda ka so nan da nan ba.
Izan ka zo ka hau ni ka ba ni iska
Na sha, ba inda ba zan je da kai ba.
Ashe ba mai hawa keke ya more
Izan ba wanda ya iya zanzaro ba.
Ɗaukowar:
abbasmusajega750@gmail.com.
Ɗalibi A Sashen Harsunan Nijeriya Jami'ar Usmanu Ɗanfodiyo Sakkwato.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.