2.5 Waƙoƙin Raino - Daga Littafin WAƘOƘIN HAUSA NA GARGAJIYA (Page - 95)

Citation: Gobir, Y.A. & Sani, A-U. (2021). Waƙoƙin Hausa Na Gargajiya. Kaduna: Amal Printing & Publishing Nigerian LTD. ISBN: 978-978-59094-0-01.

2.5 Waƙoƙin Raino 

Raino na nufin rarrashi ko lallaɓin jariri yayin da yake kuwwa domin ya yi shiru ko kuma domin kada ya yi kuka ko ya ƙosa da yanayin da yake ciki. Za kuma a iya kallon ma’anar raino da “Kulawa da jariri na gaba ɗaya.” Wato lura da al’amura da yanayi ko halin da jariri yake ciki, tare da samar masa da buƙatunsa. A lokutan raino, mai raino na rera wa jariri ko yaro waƙoƙi daban-daban tare da rausaya shi (yi masa rawa). Daga cikin misalan waƙoƙin raino akwai:

Gusau, (2008: 225) ya kawo misalin waƙar raino da aka samar a wajajen shekarar 1952 da ta kasance kamar haka:

2.5.1 Bari Kuka Sa’idu - Daga Littafin WAƘOƘIN HAUSA NA GARGAJIYA (Page - 92)

Citation: Gobir, Y.A. & Sani, A-U. (2021). Waƙoƙin Hausa Na Gargajiya. Kaduna: Amal Printing & Publishing Nigerian LTD. ISBN: 978-978-59094-0-01.

Yi shiru bari kuka Sa’idu,

Me kake wa kuka Sai’du?

 

Mai kuɗɗi Sa’idu,

Ku taho ku gane shi,

Ku yo ziyara.

 

Ɗan yaro ya buwaya,

Ɗan yaro sai dai a bi ka,

Amma ba ka bi su ba.

 

Ɗan Malammai Sa’idu,

Ɗan Alƙalai Sa’idu,

Gidanku an yi gadon karatu.

 

Ga kuma kuɗɗi barkatai,

Kuma ga shi kun gaji hanƙuri.

Kai yi shiru ɗan yaro Sa’idu,

Yi shiru bari kuka Sa’idu.