Wannan wasan tashe ne wanda yara maza ke gudanarwa cikin watan azumi. Yawan masu gudanarwar sukan kai misalin biyar ko sama da haka. Ɗaya daga cikinsu zai kasance jagora, wanda kuma shi ne taɓaɓɓe.
5.1 Taɓaɓɓe
5.1.1 Lokaci Da Wurin Wasa
i. An fi gudanar da wannan wasa da dare, kamar dai sauran wasannin tashe. Amma wasu lokutan akan yi shi da hantsi ko da yamma.
ii. Akan shiga gida-gida domin gudanar da wannan wasan tashe. Sannan sukan yi shi a dandali, wurin da taron jama’a suke. Kamar bakin shaguna ko wurin hutawa da makamantansu.
5.1.2 KayanAiki
i. Igiya
ii. Taɓarya ko sanda
iii. Gawayi ko baƙin bayan tukunya
5.1.3 Yadda Ake Gudanar da Wasa
Ɗaya daga cikin yaran (Taɓaɓɓe) zai shafe fuskarsa da baƙin tukunya ko gawayi ko dai wani abu makamancin wannan. Fuskar za ta zama gwanin ban tsoro. Daga nan zai nemi taɓarya ko sanda ya saɓa a kafaɗa. Sauran yara kuwa za su ɗaura masa igiya a ƙugu. Haka za su riƙa zuwa gida-gida ko kuma wurin taron maza (idan a dandali ne). Taɓaɓɓe zai riƙa yunƙurin kai wa jama’a bugu, tare da yi musu barazana da zazzare idanuwa. Sauran yara kuwa za su riƙa janyo shi baya ta hanyar amfani da igiyar da suka ɗaura masa a ƙugu. Da zarar sun janyo shi baya, sai kuma ya sake zabura cikin ƙoƙarin kai wa mutanen da ke gabansa farmaki. Sai kuma yaran su sake janyo shi baya. Haka dai za su riƙa yi, taɓaɓɓe yana ba da waƙa sauran yara na amsawa.
5.1.4 Waƙar Wasa
Taɓaɓɓe: Ni ne baƙin birin nan da ake faɗi,
Yara: Taɓaɓɓe!
Taɓaɓɓe: Ba ga ni ba?
Yara: Taɓaɓɓe!
Taɓaɓɓe: A taɓa ni man!
Yara: Taɓaɓɓe!
Taɓaɓɓe: In rugurguza!
Yara: Taɓaɓɓe!
Taɓaɓɓe: Ba ga ni ba!
Yara: Taɓaɓɓe!
Taɓaɓɓe: A taɓa ni man!
Yara: Taɓaɓɓe!
Taɓaɓɓe: In bubbuga!
Yara: Taɓaɓɓe!
5.1.5 Tsokaci
Wannan wasa yana ƙunshe da nishaɗi. Sannan yana nuni ga wani hali na taɓaɓɓen mutum, wato mahaukaci.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.