5.19 Dokin Almajirai
Wannan wasa ne na nishaɗi da kuma motsa jiki da yara maza ke gudanarwa a dandali. Yara uku ne zuwa sama da haka ke gudanar da wannan wasa. Ana gudanar da wannan wasa ne a dandali, saboda haka da dare aka fi gudanar da shi, musamman lokacin farin wata.
5.19.1 Yadda Ake Wasa
Yaro guda zai tsaya. Sai wani kuma ya ɗaga kafaɗunsa daga baya sannan ya sunkuya. Sannan wani yaron daban zai hau bayan wanda ya sunkuya ɗin. A haka wanda ke tsaye da kuma wanda yake sunkuye za su riƙa tafiya, yayin da wanda ya sa wa zai riƙa ba da waƙa su kuma suna amsawa kamar haka:
Bayarwa: Dokin almajirai,
Amshi: Sukuta.
Bayarwa: In ba sukutan ba,
Amshi: Sukuta.
Bayarwa: Yau na hau jaki,
Amshi: Sukuta.
Haka za su je iyakar wurin da aka ƙayyade za a riƙa zuwa a wasan sannan su dawo. Daga nan kuma na saman sai ya sauka wani ma ya hau. Haka za a ci gaba da yi har sai an yi wa kowa.
5.19.2 Tsokaci
Wannan wasa hanya ce ta motsa jiki ga yara. Sannan yana samar da nishaɗi gare su.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.