5.60 Tashi Wali
Wannan ma wasan tashe ne na maza da ke cikin rukunin wasannin tashe. Kimanin yara huɗu zuwa sama da haka ake gudanar da shi. Sannan wasa ne da ke buƙatar kayan aiki. Kamar sauran wasannin tashe, an fi gudanar da shi da dare, bayan an sha ruwa.
5.60.1 Kayan Aiki
i. Hula da rawani
ii. Alkyabba ko wata riga mai faɗaɗan hannaye
iii. Carbi
iv. Auduga
5.60.2 Yadda Ake Wasa
Ɗaya daga cikin masu wasa zai sanya hula da rawani sannan a yi masa gemu da saje na auduga. Zai kuma sanya alkyabba ko wata riga mai manyan hannaye buru-buru. Sai kuma ya nemi dogon carbi ya riƙe a hannu. Wannan shi ake kira Wali.
Yayin da aka je wurin tashe, waliyi zai riƙa buɗa hannuwa yana faman yunƙurawa sama, kamar dai mai tashi. Zai kuma riƙa sanya waƙa, sauran yara suna amsawa. Ga yadda waƙar take:
Wali: Wali zai tashi,
Amshi: Kar ka tashi wali.
Wali: Zan tashi,
Amshi: Kar ka tashi Wali.
Wali: Zan lula,
Amshi: Kar ka tashi wali.
Wali: Zan cilla,
Amshi: Kar ka tashi Wali.
Haka dai za a ci gaba, har sai an sallame su.
5.60.3 Tsokaci
Wannan wasa yana samar da nishaɗi ƙwarai, musamman ga masu kallo. Sannan yana ɗauke da ɓirɓishin wani tunani na Bahaushe dangane da waliyi. Wato kan cewa sukan yi abubuwa ban mamaki da dama, daga ciki har da tashi sama. Sai dai an gina wasan ne kan raha da ban dariya. Da Aku Waziri ya san da wannan Wali, lallai da ya masa kashedi cewa, ko ‘yan Sama Jannati ba su wanye da daɗi ba.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.