6.13 Ruwa Mai Malale
Wannan ma wasa ne da ‘yanmata ke gudanarwa wadda ba na tashe ba. An fi yin sa da dare, musamman lokacin farin wata. Hasali a dandali ake wasan, amma yakan kama a yi a cikin gida mai fili ko kuma a ƙofar gida.
6.13.1 Yadda Ake Wasar Ruwa Mai Malale
Yara sukan yi da’ira mai ɗan faɗi ta hanyar barin‘yar tazara a tsakanin junansu. Daga nan ɗaya daga ciki za ta shigo tsakiya. Za ta fara ba da waƙa yayin da saura ke amsawa. Sannan yaran za su riƙa tafi yayin da ake wannan waƙa. Ga yadda waƙar take:
Bayarwa: Ruwa mai malalae,
Amshi: Ɗagogwarago.
Bayarwa: ‘Yar yarinya,
Amshi: Ɗagogwarago.
Bayarwa: Ke wa kike so?
Amshi: Ɗagogwarago.
Bayarwa: Ɗan farin yaron nan,
Amshi: Ɗagogwarago.
Bayarwa: Wanan ɗan gayen nan,
Amshi: Ɗagogwarago.
Bayarwa: Mai kyawu da riga,
Amshi: Ɗagogwarago.
Bayarwa: Mai kyawu da wando,
Amshi: Ɗagogwarago.
Bayarwa: Mai kyawu da hula,
Amshi: Ɗagogwarago.
Bayarwa: Mai kyawun takalmi,
Amshi: Ɗagogwarago.
Bayarwa: Shi ne take so,
Amshi: Ɗagogwarago.
Bayarwa: Ai ta gaya min,
Amshi: Ɗagogwarago.
Bayarwa: Shi za ta aura,
Amshi: Ɗagogwarago.
6.13.2 Tsokaci
Wannan wasa na samar da nishaɗi da annashuwa ga yara. Sannan waƙar wasan na ɗauke da wani saƙo zuwa ga iyayensu da kuma sauran mutanen gari. Wannan saƙo ya ƙunshi bayyana cewa sun fara soyayya, ko irin muradinsu na aure da dai makamantansu.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.