6.34 Kwalba-Kwalba Dire
Wannan ma wasan gaɗa ne na dandali. Mutane biyar ne suka fi gudanar da shi. Amma wani lokaci yawan masu wasan na wuce haka.
6.34.1 Wuri Da Lokacin Wasa
Kasancewar wasan na dandali, an fi gudanar da shi da dare, musamman lokacin farin wata.
6.34.2 Yadda Ake Wasa
Yayin da ake wannan wasa tsakanin yara biyar, guda huɗu za su tsaya su mannu da juna. Wadda za ta dire kuwa, za ta kasance a gabansu, ta juya musu baya. Daga nan za su fara waƙa da tafi. Mai direwa za ta riƙa faɗuwa jikin masu cilli, su kuwa za su riƙa riƙe ta ba tare da ta kai ga faɗuwa ƙasa ba. Sai kuma su ɗago tasu cilla ta gaba. Da zarar ta dire kuma za ta sake dawowa ta faɗo jikinsu. Ga nan yadda waƙar take:
Masu Cilli: Kwalba-kwalba dire,
Mai Direwa: Ni ba zan dire ba,
Sai na ga Magaji,
Magajin Magajiya,
Mai hawa kujera,
Ya raɓarɓashi kaji,
Hanji na iyaye,
Hanta ta maƙwabta,
Sauran kuma nawa.
A wannan gaɓa masu cilli za su riƙa ambaton rukunin jama’a daban-daban, mai direwa kuwa za ta kokkoyi salon tafiyar wadda aka ambata. Ga yadda abin yake:
Masu Cilli: Tafiyar sojoji,
Mai Direwa: Ci naga-naga naga-naga Dadan Hasiya.
MasuCilli: Tafiyar ‘Yansanda,
Mai Direwa: Ci naga-naga naga-naga Dadan Hasiya.
MasuCilli: Tafiyar maigoyo,
Mai Direwa: Ci naga-naga naga-naga Dadan Hasiya.
MasuCilli: Tafiyar mai mashin,
Mai Direwa: Ci naga-naga naga-naga Dadan Hasiya.
MasuCilli: Tafiyar babanki,
Mai Direwa: Nan kuɗi, nan kuɗi nan banki,
Ya cika.
Da zarar an zo wannan gaɓa, to yin mai direwa ya ƙare. sai ta koma cikin ‘yan cilli wata kuma ta fito domin direwa.
6.34.3 Tsokaci
Wannan wasa hanya ce ta motsa jiki tare da samar da nishaɗi da annashuwa ga yara. Sannan tana ɗauke da wani saƙo game da burin kowace ‘ya mace na samun aure a gidan wadata. Kamar yadda mai direwa ba za ta dire ba har sai ta ga Magaji … Sannan wasan na nuna Adabin ɗabi’un wasu gidaje game da haƙƙin maƙwabtaka da na iyaye.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.