6.35 Rurujina
Wannan wasa ne da yara mata ke gudanarwa. Yana ɗaya daga cikin wasannin zaune. Kimanin yara biyu zuwa sama ne suke gudanar da wannan wasa. Yawansu na iya kaiwa goma ko ma sama da haka. Sannan yana tafiya da waƙa.
6.35.1 Wuri Da Lokacin Wasa
i. Akan gudanar da wannan wasa a dandali ko a wurin jaura, ko makarantun boko (lokacin shan iska)
ii. Wannan wasa ana yin sa da dare ko da hantsi ko da yamma duka.
6.35.2 Yadda Ake Wasa
Yara za su zauna a tsarin da’ira, sannan kusa da juna. Daga nan kowace za ta kifa hannuwanta a ƙasa. Wato tafin hannuwanta su kasance a ƙasa. Sai kuma a fara waƙa a tare. Yayin da ake waƙar, masu wasa za su riƙa buɗe tafukan hannayen nasu (wato bayan hannuwansu su kasance a ƙasa) sannan suna rufewa, a tare. Duk wadda ta ɓata, to za ta koma gefe. Haka za a yi ta yi har sai ya rage saura mutane biyu. Yayin da ɗayarsu ta ɓata, nan ne wasa ta je ƙarshe. Sai kuma a sake daga fari ko a canza wani wasan. Waƙar wannan wasa ita ce:
Rurujina,
Rujina-rujina,
Rujina rub!
Wawagina,
Wagina-wagina,
Wawwaginawa.
6.35.3 Tsokaci
Wannan wasa hanya ce ta samar da nishaɗi ga yara. Sannan yana ɗaya daga cikin wasannin da ke samar da nutsuwa. Domin dole ne mai wasa ta nutsu don kada ta kuskure wa lokacin buɗe hannu ko rufewa.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.