6.41 Ragadada
Wannan na ɗaya daga cikin wasannin mata na tashe da ya sanu sosai. Kimanin yara shida zuwa sama ne suke gudanar da wannan wasa. Sukan bi gida-gida bayan shan ruwa a watan Ramalara (watan azumi).
6.41.1 Kayan Aiki
Kayan sawa tsoffi marasa kyau
6.41.2 Yadda Ake Wasa
Akan yi wa ɗaya daga cikin masu wasa shigar tsoffin kaya, kuma marasa kyau. Za ta zama tamkar ƙazama da take cikin rashi (rashin kuɗi). Daga nan yara za su fara bi gida-gida. Duk gidan da suka isa, za su fara waƙa. Zabiya za ta riƙa ba da waƙar, saura kuma na amsawa.
A ɗaya ɓangaren kuma, wadda aka yi wa shigar kaya marasa kyau za ta riƙa taku ɗaiɗai. Wato dai ana nuna da ita ake magana a cikin waƙar. Waƙar kuwa ita ce:
Bayarwa: Ragadada
Amshi: Ta hana ki riga.
Bayarwa: Ragadada,
Amshi: Ta hana ki zane.
Bayarwa: Ragadada,
Amshi: Ta hana ki ɗankwali.
Bayarwa: Tsire,
Amshi: Ya hana ki riga.
Bayarwa: Tsire,
Amshi: Ya hana ki zane.
Bayarwa: Tsire,
Amshi: Ya hana ki ɗankwali.
Bayarwa: Balangu,
Amshi: Ya hana ki riga.
Bayarwa: Balangu,
Amshi: Ya hana ki zane.
Bayarwa: Balangu,
Amshi: Ya hana ki ɗankwali.
Haka za a yi ta lissafo abinci musamman dangin ƙwalama, ana kuma nuna cewa su ne suka hana ta yin arziki. Sannan kwaɗayinsu ne ya sanya mata tsiya, wadda har ba ta iya ɗinka kayan ƙwarai.
6.41.3 Tsokaci
Wannan wasa yana samar da nishaɗi musamman ga masu kallonsa. Sannan yana ɗauke da faɗakarwa game da kwaɗayi. Yana nuni da cewa, kwaɗayi na jefa ɗan Adam ga wahalar rayuwa.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.