6.45 ‘Yar Ƙwado
Wannan wasan yara mata ne da aka fi gudanarwa lokacin damina. Wato lokacin da ƙasa take da damshi. Tsarinsa ya yi kama da na wasan‘Yar Cafel. Sai dai sun bambanta ta wasu ɓangarori. Yara biyu ma sukan iya gudanar da wannan wasa a tsakaninsu. Amma yawansu na iya kasancewa sama da haka sosai.
6.45.1 Wuri Da Lokacin Wasa
i. Akan gudanar da wannan wasa a gida ko wurin sauran yara ko makarantun boko.
ii. Ana wannan wasa da hantsi ko da yamma.
iii. Ƙwado
6.45.2 Kayan Aiki
i. Ƙananan duwatsu (tsakuwowi)
ii. Kara ko itace ko cokali ko wani abu makamancin wannan (domin tonon rami)
6.45.3 Yadda Ake Wasa
Yara sukan yi amfani da ɗaya daga cikin abubuwan da aka ambata a ƙarƙashin ‘ii’ na 6.45.2 domin su tona ƙaramin rami marar zurfi. Wato ɗan gurbi amma mai matsakaicin faɗi. Yawanci tsawonsa bai kai ramin wasan Carafke ba. Sai dai ya fi shi faɗi. Sannan kowacce za ta ɗebo duwatsu adadin da aka ƙayyade a hannunta.
Mai gudanar da wasa za ta zuba duwatsunta cikin wannan gurbi. Waɗannan duwatsu akan kira su da ‘ya’ya. Daga nan za ta riƙa jefa ƙwadonta sama tare da ɗaukar ‘ya ɗaya daga cikin ramin kafin ƙwado ya sauko ta cafe. Yayin da ta kasa café ƙwadon ko kuma ta gaza ɗauko ɗa daga cikin ramin, ko ta ɗauko sama da ɗaya, to ta faɗi. Don haka ta gefenta za ta karɓi wasa.
Haka za a ci gaba da wannan wasa. Duk wadda ta tsince duwatsunta kaf, to ta fita. Don haka za ta riƙa farin ciki tare da jiran abokan wasanta.
6.45.4 Tsokaci
Wannan wasa na samar da nishaɗi ga masu gudanarwa.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.