6.72 Iye Nanaye
Wannan wasa ne na yara mata. Yara biyu ma na iya gudanar da wannan wasa. Sai dai yawansu na iya wuce haka, zuwa huɗu ko shida ko takwas ko ma fin haka. Abin lura a nan shi ne, ‘yan wasan sukan kasance ne ta bibbiyu.
6.72.1 Wuri Da Lokacin Wasa
i. Akan gudanar da wannan wasa a dandali ko wurin biki ko wani wurin taron yaran mata.
ii. Akan gudanar da wannan wasa da hantsi ko da yamma ko da dare, lokacin farin wata. Lokacin ya danganta da wurin da ake gudanar da wasan.
6.72.2 Yadda Ake Wasa
Yara biyu za su fuskanci juna. Sannan za su fara waƙa tare da tafi da kuma tsalle. A duk lokacin da suka yi tsalle a tare, ɗaya za ta mai da ƙafafunta zuwa ɓarin dama ɗaya kuma ta mayar da nata zuwa hagu. Ga yadda waƙar take:
Iye nanaye,
Ayyaraye iye,
Ayyaraye iye nanaye,
Mu je ke Fati,
Ai Fati na gida,
Ai Fati na gida,
Ba ta zo ba.
Ƙwaleru zai biya,
Ƙwaleru zai biya,
A ranar gobe,
Ƙwaleru zai biya,
Ƙwaleru zai biya wasanmu ragas.
6.72.3 Tsokaci
Wannan wasan hanya ce ta motsa jiki ga yara. Sannan waƙar wasan na ɗauke da wani saƙo da ke nuni da al’adar Bahaushe inda samari ke biya wa ‘yan matansu kuɗi irin na kwalliya da ashobe da makamantansu.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.