6.98 Ɗanmaliyo-Maliyo
Wannan ma wasa ne da ‘yanmata ke yi. Yana kama da wasan Salamatu da aka yi bayani a sama. An fi gudanar da wasan da dare, sai a wasu lokuta da ba a rasa ba da ake yin sa da yamma ko hantsi. Mafi yawancin garuruwan ƙasar Hausa an san da wannan wasa. Sai dai yadda ake gudanar da shi kan ɗan bambanta sakamakon bambancin wuri da karin harshe da makamantansu. Akan yi wasan ne a dandali ko filin ƙofar gida.
6.98.1 Yadda Ake Wasan Ɗanmaliyo-maliyo
‘Yan wasa na jeruwa wuri ɗaya, haɗe da juna. Ɗaya daga ciki za ta kasance a gaba. Daga nan wacce take gaban ko dai ɗaya daga cikin ‘yan wasa za ta riƙa ba da waƙa saura suna amsawa. Yayin da ake wannan waƙa, yarinyar da take gaba za ta riƙa faɗowa saura. Su kuwa za su tallafe ta su miƙar da ita tsaye. Haka za a ci gaba da yi har sai an ƙare waƙar. Daga nan sai wata yarinyar ta koma gaba. A haka – a haka har kowacce daga cikinsu ta yi
6.98.2 Waƙar Wasan Ɗanmaliyo-maliyo
Jagora: Ɗanmaliyo-maliyo.
‘Y/Amshi: Maliyo!
Jagora: Ɗanmaliyo nawa.
‘Y/Amshi: Maliyo!
Jagora: Ya tafi ina ne?
‘Y/Amshi: Maliyo!
Jagora: Ya tafi Ilori?
‘Y/Amshi: Maliyo!
Jagora: Ba zai dawo ba.
‘Y/Amshi: Maliyo!
Jagora: Sai a watan gobe.
‘Y/Amshi: Maliyo!
Jagora: Gobe da labari.
‘Y/Amshi: Maliyo!
Jagora: Jibi da labarai.
‘Y/Amshi: Maliyo!
6.98.3 Tsokaci
Wannan wasa hanya ce ta motsa jiki da kuma nishaɗantarwa tsakanin ‘yanmata. Domin kuwa watan goben ya yi, kuma Ɗanmaliyo bai dawo daga Ilorin ba.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.