Citation: Gobir, Y.A. & Sani, A-U. (2021). Waƙoƙin Hausa Na Gargajiya. Kaduna: Amal Printing & Publishing Nigerian LTD. ISBN: 978-978-59094-0-01.
7.2 Saboda Manzon Allah
Wannan ta kasance ɗaya daga cikin waƙar bara da mabarata ke amfani da ita a ƙasar Hausa. Ba mutum guda ke rera wannan waƙa ba, a maimakon haka, akan samu mabarata musamman daga uku zuwa sama. Ɗaya daga ciki zai riƙa bayarwa, saura kuwa za su riƙa amsawa. Sannan manya ne aka fi saninsu da wannan waƙa. Ga yadda waƙar take:
Bayarwa: Masu gida salamu alaikum,
Amshi: Saboda Manzon Allah.
Bayarwa: Ku ba mu domin Allah,
Amshi: Saboda Manzon Allah.
Bayarwa: Domin Manzon Allah,
Amshi: Saboda Manzon Allah.
Bayarwa: Alhaji ko Modibbo,
Amshi: Saboda Manzon Allah.
Bayarwa: Ko Hajiya mai niyya,
Amshi: Saboda Manzon Allah.
Bayarwa: A ba mu domin Allah,
Amshi: Saboda Manzon Allah.
Bayarwa: Domin Manzon Allah,
Amshi: Saboda Manzon Allah.
Bayarwa: Ita sadaka guzuri ce,
Amshi: Saboda Manzon Allah.
Bayarwa: A ba mu don Lillahi,
Amshi: Saboda Manzon Allah.
Bayarwa: A ba mu don mai janna,
Amshi: Saboda Manzon Allah.
Bayarwa: Ga wanda Allah Yab ba,
Amshi: Saboda Manzon Allah.
Haƙiƙa wannan waƙar bara tana ɗauke da jigon roƙo ne kai tsaye, inda masu barar ke haɗa wanda suke roƙo da Allah da kuma Manzonsa domin a ba su sadaka. Daga ciki kuma sun yi furucin girmamawa ga wanda suke roƙa, wato inda suke faɗin Alhaji da Modibbo da kuma Hajiya. Bayan nan sun yi jan hankali kan cewa sadaka guzuri ce, ke nan dai duk wanda ya ba su zai samu sakamakon alkairi, musamman ranar gobe kiyama.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.