8.6 Wandara A Sha Maganin Ƙaba
Wannan wasa ne na manya da ke cikin jerin wasannin tashe. Yawanci akan gudanar da shi da dare bayan an sha ruwa. Sannan akan bi wuraren da mutane ke taruwa ne domin gabatar da wasan. Adadin masu gudanarwa sakan kai mutane uku zuwa sama da haka. Sannan yana buƙatar kayan aiki.
8.6.1 Kayan Aiki
i. Igiya
ii. Butar duma ko wani abu da za a yi amfani da shi maimakon wannan
iii. Babbar riga/malum-malum
iv. Sanda
v. Hula da rawani
8.6.2 Yadda Ake Wasa
Ɗaya daga cikin masu wasa zai sanya babbar riga da hula da rawani, sannan ya riƙe sandar dogarawa. Wanda ya yi wannan shiga akan kira shi ‘baba.’ Za kuma a samu gorar duma a ɗaure saman da igiya, a rataya masa a wuya. Gorar dumar za ta kasance ta cikin babbar rigarsa. Za a sanya igiyarta mai ɗan tsayi yadda gorar za ta kasance daidai kunkuminsa na gaba. Da ka kale shi, za ka ga gorar duman ta ɗago babbar rigar da ya sanya daga ciki. Wato ana ganin tulu da ta yi.
Yayin da aka je wurin wasa, baba zai riƙa tafiya yana buga gorar dumar da guiwowinsa. Wannan zai sa ta riƙa yawo zuwa gefe da gefe. Ga masu wasa, wai hakan duk ƙaba ce. Baba zai fara ba da waƙa, saura kuwa suna amsawa. Ga yadda waƙar take:
Baba: Tumbulum-bulum,
Amshi: Wandara a Sha Maganin ƙaba.
Baba: Na yi na gaji,
Amshi: Wandara a Sha Maganin ƙaba.
Baba: Asibiti goma sha bakwai,
Amshi: Wandara a Sha Maganin ƙaba.
Baba: To za ta kai ni ƙas,
Amshi: A’a ba za ta kai ka can ƙas ba.
Baba: To ni za ta kai ni ƙas,
Amshi: A’a ba za ta kai ka can ƙas ba.
Baba: Ni za ta ka da ni,
Amshi: A’a ba za ta kai ka can ƙas ba.
Baba: To ai za ta ka da ni,
Amshi: A’a ba za ta kai ka can ƙas ba.
8.6.3 Tsokaci
Wannan wasa yana samar da nishaɗi musamman ga masu kallo. Yana kuma nuna hoton wani yanayi da ɗa namiji ke shiga yayin da irin wannan lalura ta same shi, wato ƙaba.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.