2) Riya da dora wa kai aiki: Abin da ya fi fitowa sarari kenan a duk lokacin da mace ta so yin kishi, a zahiri ba don Allah take yin wasu abubuwan ba, tana yi ne tare da boye kishi a zuciyarta, ƙoƙarinta a ga baƙin kishiyarta, in ma ta rasa abin da za ta jingina wa kishiyar sai ta ƙirƙiro wani abin ta kambama shi don ta isa ga abin da take so, bari na kawo abin da ya faru a gabana ba labari aka ba ni ba a wata jaha can mai nisa: Uwargida ta kawo wa baƙin mijinta abinci ta ajiye musu, tana dan jan su da labari tana ƙoƙarin su ci. Bayan ta fita don ta kawo musu wasu abubuwan da za su ƙara, saboda a tunaninta abin da ta kawo musu bai ishe su ba.
Nan take amaryar ta zo da zafinta tana fada tana
cewa "Jahilci bai yi ba wallahi, ta ya za ka yi baƙi ka wulaƙanta
su? Wadannan fa baƙin mijinka ne, ka kawo musu abinci amma ka saka
musu cokalin ƙarfe? Ni wallahi ba yadda zan ba wa baƙon da
nake girmamawa abinci da cokalin ƙarfe, ko na rasa na roba zan nemo a maƙwabta"
ban san ya aka ƙare ba amma na san a garuruwansu ba sa ma'amalla
da cokalin roba ko kadan, hasali ma rashin girmamawan ne a ba su cokalin roba
su ba yara ba, amaryar dai ta jefar da cokalin ƙarfen ta saka musu na
roba.
Mace mai baƙin kishi kan yi haba-haba da mutane kamar
daga cikin zuciyarta suke, bayan ba ta ma ƙaunar ganinsu, abin da
take so kawai su yabe ta su ce ita mutuniyar kirki ce abokiyar zaman tata ce
mutuniyar banza. a kan sami wace za a kintsa magana da ita kan 'yan uwan miji
sai kishiyar ta saki jiki ta zartar da abin da aka shirya ita sai ta ƙi
aiwatarwa ta dawo tana zagin wancan tana gaya musu gaskiya da ƙarya
don ta bata ta a idonsu ta ce musu ai mutuniyar banza ce bayan tare aka shirya.
In ta ga kishiyar ba ta da kudi sai ta yi maza ta yi wa uwarmiji farfesun kaza,
ko ta sayo mata kayan dadi, ta yi ta haba-haba da ita yadda za ta ce ita ce
diyar albarka tana kula da ita sosai, bare ma a ce tana da wasu 'yan abubuwa da
ta gaza a kansu tsab za ta kwaso ta gaya wa uwar-mijin, buƙatarta rigima ta shiga
tsakaninsu.
Akan yi hakan ne don wani lokaci in ya zo da
kuskure uwar-mijin na iya kiran danta ta kwashe ƙarya da gaskiya na abin
da aka fada mata ta gaya masa, sai a fara samun sabani tsakaninsa da matar.
Koda yake uwarsa ta fada masa amma kintsa mata aka yi, da yawa in ka ga mata
masu mugun kishi suna haba-haba da mutane sama da yadda aka saba gani ba don
Allah suke yi ba, dora wa kai ne don kaiwa ga wani buri dake zuciyarsu na son a
saki abokiyar zamansu, ko saka ta a halin ni-'ya-su. In aka lura ba sa yin
hidimar baki rufe sai sun fado ƙoƙarinsu a fili gami da sukar kishiyar.
Ƙiri-ƙiri za
ka ji wata na ce wa 'yan uwan miji "Wai kuwa wance ta ba ku kazar da ta
soya jiya? Kun dai san wallahi da ni ce na yi aikin dole sai kun ci kazannan
don dalilin dan uwanku muka samu" idan da za ka yi bincike mai zurfi za ka
tarar tare suka ƙulla cewa a hana su, amma da suka zo gabansu sai
ta tsame kanta ta tura wa abokiyar zamanta. A hali irin wannnan dole ta kiyaye,
ta fahimci wace take zaune da ita, ta karanci hanyoyin da take bi don ta baƙanta
ta a gaban maigidansu ko 'yan uwan mijinsu, a ƙarshe ta fara bin
hanyoyin da suka kamata don ƙwatar kanta daidai gwargwado.
Ita dai kar ta shiga gasar da ta fi ƙarfinta,
kar ta yi niyyar rama mummunan aiki da mummuna, a maimakon haka ta riƙe
gaskiya kuma ta dena bin wancan sau da ƙafa don kar ta kare mata rami sai ta zo
dab da shi ta yi tsalle ta tsallake ita kuma ta fada ciki, ta riƙa
binta a hankali kuma nesa da nesa yadda za ta riƙa ganin duk wani abin da
zai iya cutar da ita. Matar da take jefa abokiyar zamanta a irin wadannan
ramukan ba ƙaramin kishi ba ne da ita ba, buƙatarta
ta ƙarshe ita ce ta kore ta a gidan.
Su ma 'yan uwan mijin zai yi kyau su sa ido sosai
don za su iya gano kyautar da aka yi ta a kan kishi da wace aka yi don Allah,
galibin kyautar kishi ba mai ci-gaba ba ce, mai yi na samun abin da take so za
ta juya musu baya, kamar kyautar 'yan siyasa ce da suke yi don azabe su, sun ci
ko ba su ci ba zaben na wucewa shikenan, haka mai kyauta don kishi, tana samu
ta kori wancan komai ya dawo hannunta za ta fara tunanin yadda za ta ba wa
kanta kariya ta tabbatar da abinnan ya ci-gaba da zama a ƙarƙashinta. Da wahala mace
ta mallake miji ka ga tana shiri da 'yan uwansa.
Ta zare zaren kenan, wata da sassafe za ta kama
hanyar dakin uwar mijin ta share mata daki, ta wanke mata kaya, ta dafo mata
abinci ko ba ita ce da girki ba, ƙoƙarinta kawai a ce ita ce ta ƙwarai a ba ta kula ta
masamman. To wannan dan ƙaramin bom ne aka dasa, domin idan uwar ta fara
gaya wa danta irin kyautatawar da take mata, da kuma nuna rashin kular da dayar
ke yi zai so mai son uwarsa, dayar kuma in ba a bi a hankali ba tabbas za ta
bar gidan ba tare da ta shirya ba. Don maigidan na fara ganin baƙin
iyalinsa magana ta lalace kenan.
A Nan Zan Dakata Sai Mun HaÉ—u a Rubutu Na Gaba
**************************
Daga: ✍ Baban Manar AlÆ™asim
**************************
Wannan ɗaya ne daga cikin rubuce-rubuce da ke cike da faɗakarwa da ilimantarwa, waɗanda ake samarwa daga Zauren Markazus Sunnah. Ku bibiye su a kafafensu na sada zumunta domin samun ƙarin bayani. Amsoshi ba ta da haƙƙin mallakar waɗannan rubuce-rubuce, amma tana ɗora su ne da izinin Baban Manar Alƙasim.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.