Citation: Bunguɗu, U.H. (2022). Waƙoƙin Amali Sububu. Ahmadu Bello University Press Limited.
Domin samun cikakken littafi, a tuntuɓi:
Dr. Haruna Umar Bunguɗu
(Sarkin Gobir Na Bunguɗu)
Email: harunaumarbungudu@gmail.com
Phone: 08065429369
Gabatarwa
Wannan littafi ya ƙunshi bayanai ne masu inganci dangane da wani shahararren makaɗin noma wanda aka sani da suna Amali Sububu, littafin zai kawo salsalar mawaƙin ta hanyar kallon tarihinsa da samar da bayanai a kan fara waƙarsa da dangantakarsa da sauran makaɗa musamman na noma. Har ila yau, lattafin zai kawo nau’o’in waƙoƙinsa da waɗanda ya fi raja’a a kansu.
An yi nufin shirya wannan littafi ne domin ya dubi waƙoƙin Amali Sububu, don su amfanar da jama’a musamman ɗaliban makarantun sakandare da na gaba da sakandaren, har ma da malamansu waɗanda ke son su san wani abu a kan waƙoƙin noma Musamman na Amali Sububu. An yi la’akari da irin yadda waƙoƙinsa suke bunƙasa a wannan lokaci, suna yaɗuwa a dukan ɓangarorin ƙasar Hausa har da maƙwabtanta.
Makaɗa Amali Sububu ya yi waƙoƙi da yawa waɗanda suka haɗa da na noma da ma waɗanda ba na noma ba, waɗanda dukansu an fahimci cewa mutane suna da sha’awa da su, to sai aka ga ya dace a tattaro su daidai gwargwado don a alkinta su don jama’a su amfana.
Mutane kan ji waƙoƙinsa ne su saurare su domin daɗinsu, ko jin kalaman daɗaɗa zukata da mawaƙin ya yi amfani da su,
har ma wani lokaci sai mutane su riƙa samun wasu waƙoƙin don wata ƙila su saurara, ko ma wani lokaci su yi kasuwancinsu. Wannan littafin dai
zai share hawayen jama’a kan waƙoƙin Amali Sububu domin sanin yadda ya
fayyace su filla-filla.
Wannan aikin an gudanar da shi ne
a cikin mawuyatan halaye guda biyu; na farko shi ne a lokacin da shi mawaƙin baya a raye (wato ya riga ya rasu) tun kafin a fara
aikin, don haka ba a samu waɗansu bayanan da ake buƙata ba daga bakinsa, wanda idan son samu ne hakan ya fi
kyawo da inganci. Mawuyacin hali na biyu kuwa shi ne na yanayin tsaro! A
lokacin gudanar da wannan aikin ana cikin wani yanayi na rashin tsaro, inda
‘yan ta’adda suke kashe mutane da sace su suna garkuwa da su, abin ya yi
tsanani a yankin Sububu har ma garin ya watse babu kowa a ciki! Domin haka sai
ma an nemi wanda ake son a sami wani bayani daga gareshi ta waya don a san inda
yake! Idan wani lokaci an samu to a tsorace ake haɗuwa babu
aminci, kowa yana ɗar-ɗar da kowa.
Allah ya sawwaƙe mana, ya nuna mana ƙarshen wannan iftila’in[1]
amin.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.