𝐓𝐀𝐌𝐁𝐀𝐘𝐀❓
Assalamu Alaikum. Malam, ina hukuncin limamin
Jumma’a yana kan yin huɗuba
game da ‘Jin Tsoron Allaah’, amma ganin wani ɗan siyasa ya shigo sai ya sauka daga kan
maudu’insa na ‘Jin Tsoron Allaah’, ya koma yabon wannan ɗan siyasan, tare da yi masa ‘campaign’?
𝐀𝐌𝐒𝐀❗️
Wa'alaikumus Salam warahmatullahi Wabarkatuh
[1] Da farko dai Liman shi ne: Babban mutum,
shugaba, ja-gora kuma wanda ake koyi da shi a cikin maganganunsa da ayyukansa
na addini da rayuwa. Wajibi ne shi kansa ya san wannan, mabiyansa kuma su san
haka. Kuma lallai ne Liman ya kare mutuncinsa da martabarsa a idon jama’a ta
hanyar barin yin roƙo, ko bara, ko tumasanci ga mawadata da sarakuna
da ’yan siyasa a fili ko a ɓoye.
Mu kuma mabiya sai mu tashi da gaske mu taimaka
masa ta dukkan hanyoyin da suka kamata don tabbatar da hakan, kamar ta bayar da
gudunmawarmu na kuɗi don
gudanar da masallatanmu na Jumma'a da sauransu.
[2] Sannan Liman ya riƙa yi mana bayanin duk
wani abin da ka iya shige mana duhu game da ayyukansa da maganganunsa, kamar
yadda Annabi (Sallal Laahu Alaihi Wa Alihi Wa Salam) a cikin Sahih Al-Bukhaariy
ya bayyana wa Sahabbansa guda biyu da suka gan shi tare da wata mace a cikin
dare, cewa: Matarsa ce Safiyyah! A ƙarshe kuma ya ƙara da cewa:
إِنَّ الشَّيْطَانَ يَجْرِي مِنِ ابْنِ آدَمَ مَجْرَى الدَّمِ
Tabbas! Shaiɗan yana gudana a jikin ɗan Adam ta magudanar jini.
Sannan mu kuma, mu riƙa yi masa kyawawan zato
a cikin maganganu da ayyukansa waɗanda
ba mu gane ba.
[3] Amma game da sauya maudu’in huɗuba, wannan ba matsala ba ce, tun da da ma
shi Limamin ne yake rubuto, ko yake tsaro maudu’insa. Ba wani ko wasu daga
cikin masallata a bayansa ne suke tsara masa ba. Don haka, idan ya ga yiwuwa ko
samuwar yanayin da ta sa ya sauya maudu’in kuma sai ya sauya, wannan babu komai
in Shã Allahu.
Watarana Annabi (Sallal Laahu Alaihi Wa Alihi Wa
Sallam) yana cikin huɗuba a
masallacin Jumma’a sai wani mutum ya shigo, ya nemi Annabi (Sallal Laahu Alaihi
Wa Alihi Wa Sallam) da ya yi addu’a, saboda halin tsanani da al’umma suke ciki
na rashin ruwan sama a lokacin. A nan take sai kuwa Annabi (Sallal Laahu Alaihi
Wa Alihi Wa Sallam) ya ɗaga
hannu ya roƙi Allaah:
اللَّهُمَّ أَغِثْنَا! اللَّهُمَّ أَغِثْنَا!!
Ya Allaah! Ka ba mu ruwa! Ya Allaah! Ka ba mu ruwa!!
Manufa a nan: Manzon Allaah (Sallal Laahu Alaihi
Wa Alihi Wa Sallam) ya bar abin da yake yin huɗubar a kansa, a lokacin da ya ga muhimmancin
abin da mutumin ya nema.
Kodayake a iya cewa, ai shi wannan limamin babu
wani daga cikin musulmi da ya neme shi da ya sauka daga kan maudu’insa?
Amma za a iya amsawa da cewa: Haka ne, sai dai
kuma tun da dai har shi da kansa Limamin ya ga muhimmancin yin hakan a wannan
lokacin, sannan kuma dayake babu wani dalili a shari’ance da ya hana shi sauya
maudu’in, ba za a hana shi yin hakan ba. Ko da kuwa dukkan mutane ko yawancinsu
ko waɗansunsu
ba su ga hakan ba. wallahu A'alam.
[4] Magana a kan ’yan siyasar dimokuraɗiyya kuwa: Malamai sai sun yi
taka-tsantsan game da su. Amma matuƙar dai su shugabanni ne kuma musulmi, to aƙidar
mu ita ce: A girmama su, kuma a mutunta su da gwargwadon irin matsayin da
Allaah Ta’aala
ya ba su, ko da kuwa fasiƙai ne, ko kuma ma azzalumai. Kar a wulaƙanta
su, kar a raina su, ko a ɗauki
matakin yin fito-na-fito da su. Yin hakan ya fi kama da tafarkin ’yan bidi’ar
RAAFIDAH (shi’a) da KHAWAARIJ (boko-haram) ne.
Maimakon haka, sai a riƙa yi musu kyawawan
addu’o’in da suka kamata, kuma a ba su haƙƙoƙinsu na biyayya, da yi musu ɗa’a a cikin abin da bai saɓa wa dokokin shari’ar Musulunci ba. Idan
kuma sun danne, ko sun hana mu haƙƙoƙinmu, to sai mu bi hanyoyin da suka kamata domin
neman su, kamar ta yawaita addu'o'i ga Allaah Ta'aala cewa, ya ba mu.
[5] A taƙaice dai, duk sadda Limaminmu wanda muka
yarda da shi a matsayin jagoranmu a addini ya ga dacewar ya faɗi wata magana ga wani shugaba musulmi ɗan siyasar dimokuraɗiyya da muke ciki a yanzu, da kyakkyawar
manufar yin nasiha, kuma da irin kalmomin da suka dace, kuma ba su kauce wa ƙa’idar shari’a ba, bani ganin hakan wani mummunan abu
ne, in Shã Allãhu.
Amma da zai same shi a keɓe shi da shi a wani wuri don yin hakan da
shi ya fi, don gudun haifar da rashin fahimta, ko samar da ruɗani a cikin mabiya.
Idan kuma hakan ba ta samu ba, sai a yi abin da ya
sawwaƙa, kamar yadda Abu-Sa’eed
Al-Khudriy (Radiyal Laahu Anhu) ya yi ga Sarkin Muslumi nasiha a fili, a masallacin
Idi.
WALLAHU
A'ALAM
Sheikh Muhammad Abdullah Assalafiy
Zauren Fatawowi Bisa Alkur'ani Da Sunnah. Ku
kasance Damu...
𝐓𝐄𝐋𝐄𝐆𝐑𝐀𝐌👇
https://t.me/TambayoyiDaAmsoshi
𝐅𝐀𝐂𝐄𝐁𝐎𝐎𝐊👇
Https://www.facebook.com/groups/336629807654177
ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ
**************************
Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.