Sifa

 Citation: Maikwari, H.U. & Sani, A. (2020). Tahamisin Waƙaƙƙen Ƙa’idojin Rubutun Hausa. Zaria: Ahmadu Bello University Press Ltd.

394. Ita kalmar sifa bayanin zati ce,

 Ko girman jiki idan an tantance,

 Ko launinsa babu sauran wani zance,

 Ita aikinta fayyacewa a taƙaice,

  Domin bayyanar da siffa ga rabewa.

 

395. A misalan da za su zo duk siffa ne,

Ƙato, ƙatuwa bayani na sifa ne,

Guntu, guntuwa a nan duk siffa ne,

Laduwa santaleliyar yarinya ce,

  Ko kuma santamemiya gun miƙewa.

 

396. Jibgege da shi da tiƙeƙe sa su,

 Rusheshe a tunkuɗa shi a tsarinsu,

 Ɓulelen ga had da ma ɓarkeken su,

 Kalmomin sifa ka san ba a haɗa su,

  Wagege da tuttuƙe can ga tuƙewa.

 

397. Launi duk yana bayanin siffan nan,

Zance ja, baƙi, fari ka san wannan,

 Shuɗi, shuɗiya, kaloli ne sannan,

 Ga kore muna da shi du a kalar nan,

  Haka nan algashi wajen siffantawa.

 

398. Kalma kowace iri in siffa ce,

 Ko furucinta ya rabe gun zance,

 Sai ka haɗe ta in ta zo ma a rubuce,

 Kai komai yawanta, komai ta gajerce,

  Kalmominta ko guda ba a rabewa.

 

399. A rubutu na Hausa siffa, sunaye,

 Aiki, ko zaginsa duk in ka kiyaye,

 Ba a haɗe su, ba a sanya su a goye,

 Duk adadin gaɓar sifa in ka kiyaye,

  Kalma ce guda, guda aka zanawa.

 

400. A misalan da zan daɗo duka siffa ne,

 Shi dai wanga shanƙalallen yaro ne,

 Ga shi fari hala ma wai ko Buzu ne?

Jibgegen ga santamemen ƙato ne,

  Ƙaton nan baƙi ƙirin nan nika cewa.