Citation: Maikwari, H.U. & Sani, A. (2020). Tahamisin Waƙaƙƙen Ƙa’idojin Rubutun Hausa. Zaria: Ahmadu Bello University Press Ltd.
450. Waƙafi mai ruwa kamar waƙafi ne shi,
Duba ka gani wurin
faɗi ko sunan shi,
Ai sun yi guda
cikin misalin furta shi,
Sai dai wanga har
ruwa ne ƙarin shi,
Za a ɗigo samansa don bambantawa.
451. Ba a saka shi sai ga jimla tsakiyarta,
An yo tanadin muhalli na saka ta,
In aka sa ta
ko’ina an ɓata ta,
Za a saka ta nan
ga jimla a rubuta,
In ta kasance mai tsawo mai burgewa.
452. Za a saka shi nan ga jimla a gaɓarta,
Sa ta wurin da zai fi dace a saka ta,
Doka ce ta sa ta
don ba a hana ta,
Dole a sa ta nan
ga jimla tsakiyarta,
Ka ga tsawonta nan wurin bai damewa.
453. Jimlolin da za su zo
fa misali ne,
Ado a ƙoƙari fa ya zarce mutane;
Duk da ƙafa guda garai don
gurgu ne,
Tamkar dai ka ce: “abin nan da yawa ne;
Amma nai zaton
suna iya canyewa.
454. Babbar kasuwar garin nan ta Maƙarfi;
Ba kaya na marmari
sai dai kifi.
A misalin da anka yo ba shi da laifi,
Haka ma kasuwar
garin na Karofi;
Ba inuwar da ɗan mutum zai hutawa.
455. In ba ka gane ba ga
misalai ƙari na,
Na zabura na ga sun kama buguna;
Kar na biye su har ya zam an yo ɓarna.
Na ga abin yawansa ya wuce ilmina;
Tsoro yar rufe ni
nak kasa taɓawa.
456. Duk tsarin da za ka yi ai an yi shi;
Sai dai gyare-gyare don inganta shi.
An yi guda sama a nan ƙasa ma ga shi,
Duk maganar da ba ta amfanin mai shi;
Ban da baƙin jini Alu me taka sa
wa?
457. Jimlolin ga duk idan kuka rege su,
Ɗangon fari anka fara
bayaninsu,
Sai na biyunsa za
ya zo don ƙare su,
Lura da kyau akwai
alama tsakiyar su,
Za ku ga sun tsawo ga jimlar Hausawa.
458. Mun san ƙa’idar rubutu ak kara,[1]
Don haka wajibin
mu sa in mun lura,
An yi alamar da za
ta zamto jagora,
Can tsakiyarsu kan gaɓa in kuka lura,
Waƙafi mai ruwa ya zo don
gyarawa.
459. Ba don shi ba da abin ya lalace,
Ita ce ƙa’idar da taz zo a
rubuce,
In aka sa ta to da
sauƙi a karance,
Duk kuma wanda yaƙ ƙi to ya dabirce,
Jimlolin zubinsu
zai gurɓacewa.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.