𝐓𝐀𝐌𝐁𝐀𝐘𝐀❓
Assalaamu Alaikum Wa Rahmatul
Laah. Don Allaah mene ne hukuncin mijin da ba ya zuwa yin sallar jam’i a
masallaci, sai dai ya riƙa yin sallolinsa tare da iyalinsa a gida?
𝐀𝐌𝐒𝐀❗️
Wa Alaikumus Salaam Wa Rahmatul
Laahi Wa Barakaatuh.
Ko da yake malamai sun saɓa wa juna a kan wannan
mas’alar, amma ingantacciyar maganar da ta fi rinjaye a wurinsu saboda ƙarfin
hujja ita ce: Yin sallolin Jumma’a
da sallolin nan guda biyar na farilla tare da liman a cikin masallaci wajibi ne
a kan kowane namiji baligi mai hankali, amma ba Sunnah ko Mustahabbi ba ne.
Daga cikin dalilai a kan haka kuwa akwai
[1] Maganar Allaah Ta’aala cewa
وَإِذَا كُنتَ
فِیهِمۡ فَأَقَمۡتَ لَهُمُ ٱلصَّلَوٰةَ فَلۡتَقُمۡ طَاۤىِٕفَةࣱ مِّنۡهُم مَّعَكَ وَلۡیَأۡخُذُوۤا۟ أَسۡلِحَتَهُمۡۖ
Kuma idan kana cikinsu sai kuma
ka tsaida musu sallah, to waɗansu
jama’a daga cikinsu su tsaya tare da kai. (Surah An-Nisaa’: 102)
Wannan a sallar tsoro kenan.
To, idan kuwa har waɗanda suke cikin jihadin ɗaukaka Kalmar Allaah an
hore su da yin sallah a cikin jama’a, to ina kuma ga wanda yake zaune lafiya a
cikin gari?!
[2] Kuma Allaah Ta’aala ya ce
وَأَقِیمُوا۟ ٱلصَّلَوٰةَ
وَءَاتُوا۟ ٱلزَّكَوٰةَ وَٱرۡكَعُوا۟ مَعَ ٱلرَّ ٰكِعِینَ
Kuma ku tsai da Allaah, ku bayar
da Zakkah, kuma ku yi ruku’u tare da masu yin ruku’u. (Surah Al-Baqarah: 43).
Wannan umurni ya hukunta dole a
yi sallah a tare da jama’a, amma ba ɗai-ɗai ba. Kuma umurnin
Allaah a asali na wajibi ne.
[3] A cikin Sahih Muslim ya ƙulla
babi mai suna
باب يَجِبُ
إِتْيَانُ الْمَسْجِدِ عَلَى مَنْ سَمِعَ النِّدَاءَ
Babi: Wajibi ne a kan wanda ya ji
kiran sallah ya tafi masallaci.
Al-Imaam Muslim (Rahimahul Laah)
yana da fahimtar cewa zuwa masallaci don yin sallah tare da jama’a wajibi ne.
A ƙarƙashin babin kuma ya kawo hadisin
Abu-Hurairah (Radiyal Laahu Anhu), wanda ya ce
أَتَى النَّبِىَّ
- صَلَّى اللهُ عَلَيْهِ وَسَلَّمَ - رَجُلٌ أَعْمَى ، فَقَالَ : يَا
رَسُولَ اللَّهِ ، إِنَّهُ لَيْسَ
لِى قَائِدٌ يَقُودُنِى إِلَى الْمَسْجِدِ . فَسَأَلَ رَسُولَ اللَّهِ -صَلَّى اللهُ عَلَيْهِ وَسَلَّمَ - أَنْ يُرَخِّصَ لَهُ فَيُصَلِّىَ فِى بَيْتِهِ ، فَرَخَّصَ لَهُ
. فَلَمَّا وَلَّى دَعَاهُ فَقَالَ : « هَلْ تَسْمَعُ النِّدَاءَ بِالصَّلاَةِ » . فَقَالَ نَعَمْ . قَالَ « فَأَجِبْ »
Wani mutum ne makaho ya zo wurin
Manzon Allaah (Sallal Laahu Alaihi Wa Alihi Wa Sallam) ya ce: Ya Manzon Allaah!
Ba ni da ja-goran da zai ja ni zuwa masallaci. Sai ya roƙi Manzon Allaah (Sallal
Laahu Alaihi Wa Alihi Wa Sallam) ya yi masa rangwame ya yi sallah a cikin
gidansa, sai kuwa ya yi masa rangwamen. Amma da ya juya sai kuma ya kira shi ya
ce: Shin ko kana jin Kiran Sallah? Ya ce: E. Sai ya ce: To, sai ka amsa (ka zo
masallacin). (Sahih Muslim: 1518)
Idan dai mai larurar makanta kuma
mara ɗan-jagora bai
samu sassaucin ya yi sallah a gida ba, yaya mai lafiya sarai zai samu wannan
sassaucin?!
[4] Kuma Abdullaah Bn Abbaas
(Radiyal Laahu Anhumaa) ya ce: Annabi (Sallal Laahu Alaihi Wa Alihi Wa Sallam)
ya ce
« مَنْ سَمِعَ النِّدَاءَ فَلَمْ يَأْتِهِ فَلاَ صَلاَةَ لَهُ إِلاَّ مِنْ عُذْرٍ »
Duk wanda ya ji kiran sallah amma
kuma bai je masa ba to ba shi da sallah, sai dai ko in domin wani uzuri. (Sahih
Ibn Maajah: 645).
Don haka dai zuwa masallaci ga
wanda ya ji kiran sallah wajibi ne, sai dai in yana da wani uzurin da ya hana
shi. Kuma uzuri a nan shi ne kamar rashin lafiya, ko ruwan sama da makamantan
haka.
[5] Sannan kuma Abu-Hurairah
(Radiyal Laahu Anhu) ya riwaito cewa: Annabi (Sallal Laahu Alaihi Wa Alihi Wa
Sallam) ya ce
« وَالَّذِى نَفْسِى بِيَدِهِ لَقَدْ هَمَمْتُ أَنْ آمُرَ بِحَطَبٍ فَيُحْطَبَ ، ثُمَّ آمُرَ
بِالصَّلاَةِ فَيُؤَذَّنَ لَهَا ، ثُمَّ آمُرَ
رَجُلاً فَيَؤُمَّ النَّاسَ ، ثُمَّ أُخَالِفَ
إِلَى رِجَالٍ فَأُحَرِّقَ عَلَيْهِمْ بُيُوتَهُمْ ، وَالَّذِى نَفْسِى
بِيَدِهِ لَوْ يَعْلَمُ أَحَدُهُمْ أَنَّهُ يَجِدُ عَرْقًا سَمِينًا أَوْ مِرْمَاتَيْنِ حَسَنَتَيْنِ لَشَهِدَ الْعِشَاءَ »
Na rantse da wanda raina ke a
hannunsa! Na so in yi umurni da a tattaro ƙirare, sannan in yi umurnin a kira
sallah, sai kuma in umurci wani mutum ya yi wa mutane limanci, sai ni kuma in
koma ga mazajen nan da ba su zuwa masallaci in ƙona gidajensu a kansu. Na rantse da wanda
raina ne hannunsa! Idan da ɗayansu
ya san zai samu ƙashi mai tsoka a jikinsa, ko kuma kofato biyu na akuya masu
kyau, wallahi! Da ya halarci sallar isha’i.
(Sahih Al-Bukhaariy: 644, Sahih Muslim: 651).
Idan da yin sallah a masallacin
tare da liman Sunnah ne ba wajibi ba ne, to da kuwa bai yi musu barazanar ƙona
gidajensu a kansu ba. Wannan ya isa babban gargaɗi
ga masu ƙin
zuwa masallacin, da waɗanda
ma suke zuwa a makare. Allaah ya faɗakar
da mu.
[6] A cikin Sahih Muslim ya ƙulla
wani babi na musamman ya ce
باب صَلاَةُ
الْجَمَاعَةِ مِنْ سُنَنِ الْهُدَى
Babi a kan cewa: Sallah a cikin
jama’a tana daga cikin Sunnonin Shiriya.
A ƙarƙashin babin kuma ya kawo hadisin
Abdullaah Bn Mas’ud
(Radiyal Laahu Anhu) cewa
مَنْ سَرَّهُ
أَنْ يَلْقَى اللَّهَ غَدًا مُسْلِمًا فَلْيُحَافِظْ عَلَى هَؤُلاَءِ الصَّلَوَاتِ حَيْثُ يُنَادَى بِهِنَّ فَإِنَّ اللَّهَ شَرَعَ لِنَبِيِّكُمْ -صلى الله عليه وسلم- سُنَنَ الْهُدَى وَإِنَّهُنَّ مِنْ سُنَنِ الْهُدَى وَلَوْ أَنَّكُمْ صَلَّيْتُمْ فِى بُيُوتِكُمْ كَمَا يُصَلِّى هَذَا الْمُتَخَلِّفُ فِى بَيْتِهِ لَتَرَكْتُمْ سُنَّةَ نَبِيِّكُمْ وَلَوْ تَرَكْتُمْ سُنَّةَ نَبِيِّكُمْ لَضَلَلْتُمْ وَمَا مِنْ رَجُلٍ يَتَطَهَّرُ فَيُحْسِنُ الطُّهُورَ ثُمَّ يَعْمِدُ إِلَى مَسْجِدٍ مِنْ هَذِهِ الْمَسَاجِدِ إِلاَّ كَتَبَ اللَّهُ لَهُ بِكُلِّ خَطْوَةٍ يَخْطُوهَا حَسَنَةً وَيَرْفَعُهُ بِهَا دَرَجَةً وَيَحُطُّ عَنْهُ بِهَا سَيِّئَةً وَلَقَدْ رَأَيْتُنَا وَمَا يَتَخَلَّفُ عَنْهَا إِلاَّ مُنَافِقٌ مَعْلُومُ النِّفَاقِ وَلَقَدْ كَانَ الرَّجُلُ يُؤْتَى بِهِ يُهَادَى بَيْنَ الرَّجُلَيْنِ حَتَّى يُقَامَ فِى الصَّفِّ.
Duk wanda yake son ya haɗu da Allaah a gobe
(Qiyama) alhalin yana musulmi, to ya kiyaye a kan waɗannan sallolin a duk inda aka yi kiran zuwa
a yi su. Domin lallai Allaah ya shar’anta wa Annabinku (Sallal Laahu Alaihi Wa
Alihi Wa Sallam) Sunnonin Shiriya, kuma lallai ne su ɗin suna daga cikin waɗannan Sunnonin na Shiriya. To da za ku riƙa
yin sallolin a cikin gidajenku, kamar yadda wannan makararren yake yin sallar a
cikin gidansa, to da kuwa kun rabu da sunnar Annabinku. In da kuma kun rabu da
sunnar Annabinku, to da kuwa kun ɓace.
Kuma babu wani mutumin da zai yi tsarki kuma ya kyautata tsarkin, sannan ya
fita da nufin zuwa wani masallaci daga cikin masallatan nan, face kuwa Allaah
yana rubuta masa lada da kowace takawa yake yi, kuma yana ɗaukaka masa daraja da
ita, kuma yana kankare masa zunubi da ita. (Ibn Mas’ud ya ce:) Haƙiƙa!
Ni na gan mu, babu mai barin zuwa sallah a masallaci sai dai munafukin da
munafuncinsa ya bayyana a fili. Haƙiƙa! Ya kasance ana zuwa da wani mutum, a ɗauko shi a tsakanin
mazaje biyu, har sai an tsayar da shi a cikin sahu. (Sahih Muslim: 1520).
Watau dai namiji ya riƙa
yin sallah a gida ba Sunnar Annabi (Sallal Laahu Alaihi Wa Alihi Wa Sallam) ba
ce, ba ɗabi’ar
musulmin farko ba ne, kuma hanyar mutanen da suke neman kauce wa hanyar ɓata ne. Allaah ya taimake
mu.
[7] Haka kuma Abud-Dardaa’i
(Radiyal Laahu Anhu) ya riwaito daga Annabi (Sallal Laahu Alaihi Wa Alihi Wa
Sallam) ya ce
« مَا مِنْ ثَلاَثَةٍ فِى قَرْيَةٍ وَلاَ بَدْوٍ لاَ تُقَامُ فِيهِمُ الصَّلاَةُ إِلاَّ قَدِ اسْتَحْوَذَ عَلَيْهِمُ الشَّيْطَانُ فَعَلَيْكَ بِالْجَمَاعَةِ فَإِنَّمَا يَأْكُلُ الذِّئْبُ الْقَاصِيَةَ ».
Babu waɗansu mutane uku a wani ƙauye
ko wani daji da ba a tayar da iƙamar sallah a cikinsu face kuwa lallai
sheɗan ya yi rinjaye
a kansu. Don haka ka kula da sallah a cikin jama’a, domin kura tana cin akuyar
da ta yi nesa da saura ne. (Sahih Abi-Daawud: 511, Sahih An-Nasaa’iy: 817).
Idan kuwa ba a yarda mutanen ƙauye
ko daji su ƙi yin sallah a cikin jama’a ba, to yaya za yarje wa mutanen cikin gari ko birni a
kan haka?!
[8] Kuma Abu-Sa’eed Al-Khudriy
(Radiyal Laahu Anhu) ya ce: Manzon Allaah (Sallal Laahu Alaihi Wa Alihi Wa
Sallam) ya ce
« إِذَا كَانُوا ثَلاَثَةً فَلْيَؤُمَّهُمْ أَحَدُهُمْ وَأَحَقُّهُمْ بِالإِمَامَةِ أَقْرَؤُهُمْ »
Idan sun kasance mutum uku ne, to
ɗayansu ya yi musu
limanci. Kuma wanda ya fi cancantar yin limanci shi ne wanda ya fi su karatun
Alqur’ani. (Sahih Muslim: 1561)
Idan mutane uku an ɗora musu yin sallah a
cikin jam’i, to yaya kuma mazauna unguwar da take ɗauke da ɗaruruwa
ko dubannin mutane?! Wannan ma dalili ne a kan wajibcin yin sallah a cikin
jama’a.
[9] Kuma a cikin Sahih
Al-Bukhaariy ya ƙulla babi mai suna
باب وُجُوبِ
صَلاَةِ الْجَمَاعَةِ
Babin Wajibcin Sallah a cikin jama’a.
Watau dai Al-Imaam Al-Bukhaariy
(Rahimahul Laah) ma yana ganin yin sallah a cikin jama’a wajibi ne, ba Sunnah
ko mustahabbi ba.
Sai kuma ya kawo maganar Al-Hasan
Al-Basariy (Rahimahul Laah) cewa
إِنْ مَنَعَتْهُ
أُمُّهُ عَنِ الْعِشَاءِ فِى الْجَمَاعَةِ شَفَقَةً لَمْ يُطِعْهَا
Idan mahaifiyarsa ta hana shi
zuwa sallar isha’i a cikin jama’a bai halatta ya yi mata biyayya ba.
Al-Haafiz Ibn Hajr (Rahimahul
Laah) ya kawo cikakkiyar riwayar wannan atharin daga cikin Kitaab As-Siyaam na
Al-Imaam Al-Marwaziy (Rahimahul Laah) da isnadi sahihi daga maganar Al-Hasan ɗin
فِي رَجُلٍ
يَصُومُ يَعْنِي تَطَوُّعًا فَتَأْمُرُهُ أُمُّهُ أَنْ يُفْطِرَ قَالَ فَلْيُفْطِرْ وَلَا قَضَاءَ عَلَيْهِ وَلَهُ أَجْرُ الصَّوْمِ وَأَجْرُ الْبِرِّ قِيلَ فَتَنْهَاهُ أَنْ يُصَلِّيَ الْعِشَاءَ فِي جَمَاعَةٍ قَالَ لَيْسَ ذَلِكَ لَهَا هَذِهِ فَرِيضَةٌ
Dangane da mutumin da yake yin
azumin nafila sai mahaifiyarsa ta umurce shi da ya karya shi? Sai ya ce: Ya
karya shi ɗin kawai.
Babu ramuwa a kansa. Kuma yana da ladan azumin da kuma ladan biyayya ga
mahaifiyarsa. Sai kuma aka ce: Idan ta hana shi zuwa sallar Isha’i a cikin
jama’a fa? Ya ce: Wannan ba haƙƙinta ba ne. Wannan farilla ce. (Fat-hul
Baariy: 2/202)
Idan ba a yarda ya bi maganar
mahaifiyarsa wurin ƙin zuwa sallah a cikin jama’a ba, to yaya za a amince ya bi maganar wanda bai kai
ta matsayi ba, kamar mahaifi ko mata ko ɗa
ko kuma son zuciyarsa!!
[10] Malaman da suke ganin yin
sallar a cikin jama’a ba wajibi ba ne sun kafa hujja ne da waɗansu hadisai kamar wannan
Riwayar Abdullaah Bn Umar
(Radiyal Laahu Anhumaa), cewa Annabi (Sallal Laahu Alaihi Wa Alihi Wa Sallam)
ya ce
« صَلاَةُ الْجَمَاعَةِ تَفْضُلُ صَلاَةَ الْفَذِّ بِسَبْعٍ وَعِشْرِينَ دَرَجَةً »
Sallar Jama’a ta fifita a kan
sallar mutum guda da daraja ashirin da bakwai. (Sahih Al-Bukhaariy: 645, Sahih
Muslim: 1509).
A wata riwaya ta Abu-Hurairah
(Radiyal Laahu Anhu) ya ce
« صَلاَةٌ
مَعَ الإِمَامِ أَفْضَلُ مِنْ خَمْسٍ وَعِشْرِينَ صَلاَةً يُصَلِّيهَا وَحْدَهُ »
Sallah tare da Liman ta fi sallah
ashirin da biyar da mutum ya yi shi kaɗai.
(Sahih Muslim: 1508).
Dalilinsu a nan shi ne cewa: Tun
da dai sallar a cikin jama’a fifikon daraja ne kawai take da shi a kan wacce
aka yi ba a cikin jam’in ba, wannan ya nuna kenan sallar mutum guda ma ta
inganta.
Sai dai kuma kasantuwar sallarsa
shi kaɗai ta inganta
wannan bai kawar da zunubin barin wajibin yin ta a cikin jama’a da aka ɗora masa ba. Shiyasa
malamai suka bayyana cewa, domin yin sallarsa shi kaɗai ta inganta wannan bai nuna sallar a cikin
jama’a ba wajiba ba ce, musamman dayake da ma ɗabi’ar
wajibi kenan a samu ladansa ya nunnunku da yawa. (Dubi As-Shaikh Al-Albaaniy a
cikin Tamaamul Minnah, shafi 277)
[11] Waɗansu kuma suna ƙin zuwa sallar tare da
limamin ne da hujjar cewa, ba su san yanayin limamin ba: Na-kirki ne, ko ba
na-kirki ba ne.
A nan malamai sun nuna cewa, yana
daga Aqidar Ahlus Sunnah ce yin sallah a cikin masallaci ko da kuwa limamin ba
mutumin kirki ba ne. Al-Imaam At-Tahaawiy (Rahimahul Laah) ya ce
( وَنَرَى الصلاة خَلْفَ كُلِّ بَرٍّ وَفَاجِرٍ مِنْ أَهْلِ الْقِبْلَة )
Kuma muna ganin halaccin yin
sallah a bayan kowane mutum na-kirki ko na-banza daga cikin musulmi (masu
fuskantar alqibla). (Al-Aqeedatut Tahaawiyyah:)
[12] Ibn Abil-Izz Al-Hanafiy
(Rahimahul Laah) a wurin sharhin wannan maganar ya ambato riwaya a cikin Sahih Al-Bukhaariy
mai cewa
أَنَّ
عَبْدَ الله بْنَ عُمَرَ - رَضِيَ اللهُ عَنْهُ - كَانَ يُصَلِّي خَلْفَ الْحَجَّاجِ بْنِ يُوسُفَ الثَّقَفِي ، وَكَذَا أَنَسُ
بْنُ مَالِكٍ ، وَكَانَ الْحَجَّاجُ
فَاسِقًا ظَالِمًا
Abdullaah Bn Umar (Radiyal Laahu
Anhumaa) ya kasance yana yin sallah a bayan Al-Hajjaaj Bn Yuusuf At-Thaqafiy,
haka ma Anas Bn Maalik. Kuma Hajjaaj ya kasance fasiƙi ne azzalumi.
Sai kuma ya sake kawo riwaya daga
cikin Sahih ɗin dai
cewa
« يُصَلُّونَ لَكُمْ ، فَإِنْ أَصَابُوا
فَلَكُمْ وَلَهُمْ ، وَإِنْ أَخْطَئُوا
فَلَكُمْ وَعَلَيْهِمْ »
Suna yi muku limanci, to idan sun
dace ku da su duk kun dace. Idan kuma sun yi kuskure, to ku kun dace su kuma ta
shafe su.
Daga nan kuma sai ya ce
اعْلَمْ ،
رَحِمَكَ الله وَإِيَّانَا : أنه يَجُوزُ لِلرَّجُلِ أَنْ يُصَلِّي خَلْفَ مَنْ لَمْ يَعْلَمْ منه بِدْعَة وَلَا فِسْقًا ، بِاتِّفَاقِ الْأَئِمَّة
، وَلَيْسَ مِنْ شَرْطِ الِائْتِمَامِ أَنْ يَعْلَمَ الْمَأْمُومُ اعْتِقَادَ إِمَامِه ، وَلَا أَنْ
يَمْتَحِنَه ، فَيَقُولُ : مَاذَا
تَعْتَقِدُ ؟ ! بَلْ يُصَلِّي خَلْفَ الْمَسْتُورِ الْحَالِ
Ka sani, Allaah ya yi maka rahama
tare da mu: Ya halatta mutum ya yi sallah a bayan wanda bai san wata bidi’a ko
fasiƙanci
daga gare shi ba, a haɗuwar
dukkan limamai. Kuma ba shi daga cikin sharaɗin
koyi da liman cewa sai mamu ya san aqidar limaminsa, ko kuma ya jaraba shi ya
ce: Mecece aqidarka?
Shi dai ya yi sallah kawai a
bayansa wanda bai san halinsa ba.
Sannan kuma ya ce
وَلَوْ صَلَّى
خَلْفَ مُبْتَدِعٍ يَدْعُو إلَى بِدْعَتِهِ ، أَوْ فَاسِقٍ
ظَاهِرِ الْفِسْقِ ، وَهُوَ الإمَامُ
الرَّاتِبِ الَّذِي لَا يُمْكِنُهُ الصَّلَاةُ إِلَّا خَلْفَه ، كَإِمَامِ الْجُمْعَة
وَالْعِيدَيْنِ ، وَالْإِمَامِ في
صلاة الْحَجِّ بِعَرَفَة ، وَنَحْوِ ذَلِكَ
- : فَإِنَّ الْمَأْمُومَ يُصَلِّي خَلْفَه ، عِنْدَ عَامَّة
السَّلَفِ وَالْخَلَفِ . وَمَنْ تَرَكَ الْجُمْعَة وَالْجَمَاعَة خَلْفَ الْإِمَامِ الْفَاجِرِ ، فَهُوَ مُبْتَدِعٌ
عِنْدَ أَكْثَرِ الْعُلَمَاءِ . وَالصَّحِيحُ أنه يُصَلِّيهَا وَلَا يُعِيدُهَا
Kuma idan da zai yi sallah a
bayan ɗan bidi’a
wanda yake kira zuwa ga bidi’arsa, ko fasiƙin da fasiƙancinsa ya bayyana, alhali kuma shi ne
limami ratibi wanda ba zai yiwu a yi sallar ba sai dai a bayansa, kamar limamin
Juma’a ko sallolin Idi
biyu ko kuma limamin sallah a lokacin hajji a arfa, da makamantansu, to a nan
ya halatta mamu ya yi sallah a bayansa kawai a wurin ɗaukacin malaman farko da waɗanda suka biyo bayansu.
Kuma duk wanda ya bar yin sallah a bayan wani limamin da ba na-kirki ba, to shi
ma ɗan bidi’a ne a
wurin mafiya yawan malamai. Ingantacciyar magana dai: Ya halatta ya yi sallar
kuma ba zai maimaita ta ba.
Har dai zuwa inda ya ambato ƙissar
Uthmaan Bn Affaan (Radiyal Laahu Anhu) lokacin da ’yan tawaye suka kewaye gidansa, kuma wani daga cikinsu
ya je ya yi wa mutane limanci. Shi ne wani ya tambayi Uthman (Radiyal Laahu
Anhu) cewa: Kai ne fa babban limamin dukkan jama’a, wannan kuma da ya yi wa mutane limanci limamin ’yan fitina ne! Sai ya ce
( يَا
ابْنَ أَخِي ، إِنَّ الصلاة
مِنْ أَحْسَنِ مَا يَعْمَلُ النَّاسُ ، فَإِذَا أَحْسَنُوا
فَأَحْسِنْ مَعَهُمْ ، وَإِذَا أَسَاءُوا
فَاجْتَنِبْ إِسَاءَتَهُمْ )
Ɗan ɗan’uwana!
Ita sallah fa ita ce mafi kyawun abin da mutane suke aikatawa. Don haka idan
suka kyautata sai ka kyautata tare da su. Idan kuma suka munana to, sai ka
nisanci munanawarsu.
Har zuwa inda ya ce
وَأَمَّا إِذَا
أَمْكَنَ فِعْلُ الْجُمُعَة وَالْجَمَاعَة خَلْفَ الْبَرِّ ، فَهَذَا أولى
مِنْ فِعْلِهَا خَلْفَ الْفَاجِرِ . وَحِينَئِذٍ ، فَإِذَا صلى
خَلْفَ الْفَاجِرِ مِنْ غَيْرِ عُذْرٍ ، فَهُوَ مَوْضِعُ
اجْتِهَادِ الْعُلَمَاءِ : مِنْهُمْ مَنْ قَالَ : يُعِيدُ ، وَمِنْهُمْ مَنْ
قَالَ : لَا يُعِيدُ .
Amma idan ya iya samun damar yin
sallar Juma’a da ta jama’a a bayan limami mutumin kirki, to wannan shi ya fi
kamata fiye da yin ta a bayan mutumin da ba na-kirki ba. A ƙarƙashin
wannan, idan ya yi sallah a bayan limamin da ba na-kirki ba kuma ba tare da
wani uzuri ba, to a nan ne malamai suka saɓa
a cikin ijtihadinsu (ƙoƙarinsu). Daga cikinsu akwai wanda ya ce: Ya maimaita kawai.
Akwai kuma wanda ya ce ba zai maimaita ba. (Sharhu Aqeedatit Tahaawiyyah:
2/409)
Haka nan dai har zuwa ƙarshen
maganarsa (Allaah ya ƙara masa Rahama).
Muhimmin al’amari dai a nan, babu
dalilin da zai sa namiji mai ƙarfi da lafiya ya ƙi zuwa masallaci, ya
zauna ya riƙa yin sallah a gida tare da iyalinsa.
Lallai a yi wa irin wannan mutum
nasiha, a jawo hankalinsa ga irin waɗannan
nassoshin, da fatar Allaah ya shirye shi, ya dawo kan hanya tare da sauran
musulmi.
Allaah ya ƙara mana shiriya.
WALLAHU A'ALAM.
Sheikh Muhammad Abdullaah
Assalafiy
Zauren Fatawoyi Bisa Alkur'ani Da
Sunnah.
𝐖𝐇𝐀𝐓𝐒𝐀𝐏𝐏👇
https://whatsapp.com/channel/0029VaA8YpB42DcZdoRuCj3G
𝐅𝐀𝐂𝐄𝐁𝐎𝐎𝐊👇
Https://www.facebook.com/groups/336629807654177
𝐓𝐄𝐋𝐄𝐆𝐑𝐀𝐌👇
https://t.me/TambayoyiDaAmsoshi
ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ
**************************
Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.