Samosa, Shawarma, Kuli-Kuli, Kosan Wake, Kosan Rogo, Kosen Doya, Kosen Dankali Da Nama, Soyayyen Dankali

    ,

    Wannan rubutu ya kawo bayani game da yadda ake yin samosa da shawarma da ƙuli-ƙuli da ƙosen wake da ƙosen rogo da ƙosen doya da ƙosen dankali da nama da kuma soyayyen dankali da ƙwai.

    Samosa

    Kayan haɗin da za a tanada:

    i. Albasa

    ii. Attarugu

    iii. Fulawa

    iv.  Gishiri

    v. Kon filebo

    vi. Kori

    vii. Magi

    viii. Nama

    ix. Ruwa

    Za a daka ɗanyen nama wanda ba shi da kitse, sannan a soya sama-sama tare da kori da magi. A gefe guda kuma, za a yi jajjagen kayan miya , musamman albasa  da attarugu sannan a soya sama-sama a jiye gefe guda. Daga nan za a kwaɓa fulawa tare da gishiri kaɗan da kuma kwan filebo. Da zarar wannan  ya samu sai a aza firayin fan bisa wuta . Za a riƙa shafa wannan kwaɓaɓɓ iyar a fulawa cikin firayin fan ɗin. Da zarar an saka, zai kame jikinsa ya zama lafe-lafe.

    Daga nan za a ɗauko kayan miyan da aka soya sama-sama da kuma nama, a riƙa sanyawa cikin wannan  fulawar da aka ɗan gasa. Za a riƙa nannaɗewa daidai irin tsarin da ake so. Bayan an kamala, sai a barbaɗa  filawa a sama. Sai maganar soyawa a cikin mai.

    Shawarma

    Kayan haɗin da za a tanada:

    i. Bota

    ii. Fulawa

    iii. Kabeji

    iv. Karas

    v. Naman kaza

    vi. Ruwa

    vii. Suga

    viii. Tumatur

    ix. Yis

    A haɗa fulawa da bota da yis da kuma suga kaɗan, sai a kwaɓa su da ruwan ɗumi. Ana son kwaɓin ya yi ɗ an ruwa-ruwa. Bayan an kammala kwaɓin, sai a ajiye shi domin ya kumburo. A ɓ angare guda kuma, za a ɗauko kabeji da karas da tumatur a yanka. Fulawar da ke gefe kuwa, za a ɗauko ta a riƙa gutsura ta daidai gwargwado ana faɗaɗawa. Sai a riƙa sanya ta cikin firayin fan kamar yadda aka yi wa ta samosa.

    A gefe guda kuwa, za a tafasa nama, sannan a soya shi tare da kayan lambun da aka riga aka yanka. Bayan sun soyu sama-sama, sai a riƙa zubawa a cikin fulawar da aka yi bekin a riƙa naɗewa. Bayan an daɗe, za a sake mayar da shi domin bekin. Idan akwai obun, to za a sanya a ciki. Idan babu kuwa, za a iya amfani da firayin fan wanda ba ya kamawa.

    Ƙuli-Ƙuli

    Kayan haɗin da za a tanada:

    a. Gyaɗa

    b. Kayan yaji

    c. Man gyaɗa

    d. Ruwa

    Za a soya gyaɗa  a murje a fece, sannan a saka kayan yaji a ciki a kai markaɗe. Bayan an markaɗo, za a sanya cikin turmi  ko roba sannan a sanya taɓarya ko muciya a yi ta juyawa har sai mai ya fito. Za a riƙa yi ana kwashe man da ya taru. Sannan akan ɗan ƙara ruwa kafin mai ya fara fitowa domin a ji sauƙin juyawa.

    Bayan an kammala wannan , sai a ɗora bisa dutsen matsa domin a ƙara matse man da ke cikin tunkuzar. Daga nan ne kuma za a riƙa yanka ana mulmulawa, sai kuma a ri ƙ a gutsuttsurawa ƙanana-ƙanana kuma ana curawa.Waɗannan curarrun ne za a riƙa sanyawa cikin mai domin suya.

    Ƙosen Wake

    Kayan haɗin da za a tanada:

    a. Albasa

    b. Gishiri

    c. Kayan yaji

    d. Magi

    e. Mai

    f. Ruwa

    g. Tarugu

    h. Tattasai

    i. Wake

    Za a jiƙa wake , sannan a surfe  a wanke  a cire hancinsa. Daga nan za a jiƙa shi a ruwa har sai ya jima, sannan a tsane a regaye ƙasar da za ta iya kasancewa a ciki. Daga nan za a gyara tarugu da tattasai da albasa  a yanka a sama. Za a iya sanya tafarnuwa idan ana buƙata.

    Daga nan sai a kai shi markaɗe, sai dai ba a son a tsananta ruwa sosai wurin markaɗen. Saboda haka ne ma ake zuwa da ƙaramin kwano (mazubi) domin a tare ruwan wanke  injin. Bayan an dawo da shi, sai a sanya gishiri da magi da sauran kayan ƙamshi da ake buƙatar sawa, ana iya yanka ganyen  albasa  ciki, sannan sai a juya shi ƙwarai. Bayan wannan  ya samu, sai batun aza mai a saman wuta . Za a riƙa ɗiba da ƙaramin ludayi ko wani cokali mai faɗi ana zubawa cikin mai. Idan gefe guda ya soyu, sai a juya zuwa ɗaya gefen.

    Ƙosen Rogo

    Kayan haɗin da za a tanada:

    a. Albasa

    b. Gishiri

    c. Magi

    d. Rogo

    e. Ruwa

    f. Tarugu

    Za a niƙa rogo  a tankaɗe, sannan a kwaɓe shi da ruwan ɗumi, sai a saka gishiri da magi da albasa  da tarugu waɗanda aka jajjaga. Daga nan za a riƙa dunƙulawa daidai yadda ake buƙata ana soyawa da mai.

    Ƙosen Doya

    Kayan haɗin da za a tanada:

    i. Albasa

    ii. Doya

    iii. Fulawa

    iv. Kwai

    v. Madarar ruwa

    vi. Magi

    vii.  Mai

    viii. Ruwa

    ix. Tarugu

    Za a fere  doya a wanke  ta sosai, sai a markaɗa ta da bilanda har sai ta yi laushi. Kada a sanya ruwa sosai yayin wannan  markaɗe. Bayan an kamala, sai a sanya fulawa da madar ruwa da kuma ƙwai. Sannan za a sanya jajjagen tarugu da albasa  a juya su sosai. Idan ya juyu, zai kasance mai kauri. Daga nan sai a a fara soyawa cikin mangyaɗa.

    Ƙosan Dankali Da Nama

    Kayan haɗin da za a tanada:

    i. Albasa

    ii. Attarugu

    iii. Dankali

    iv. Fulawa

    v. Gishiri

    vi. Magi

    vii. Man gyaɗa

    viii. Nama

    ix. Ƙwai

    x. Ruwa

    Za a wanke  nama a tafasa, sai a sanya magi da gishiri da albasa  a markaɗe tare da attarugu da albasa sannan a juye a kwano. Sai kuma a ɗauko dankalin turawa a tafasa shi ya yi laushi, sannan a farfasa shi cikin kwano. Daga nan za a zuba naman ciki. Bayan nan sai a zuba fulawa a ciki a saka gishiri da magi a juya sosai har su haɗe. Sai a ɗora mai a kan wuta  a riƙa ɗiba ana soyawa.

    Soyayyen Dankali Turbuɗe Cikin Ƙwai

    Kayan haɗin da za a tanada:

    i. Albasa

    ii. Dankalin Turawa

    iii. Gishiri

    iv. Kayan yaji

    v. Magi

    vi. Man gyaɗa

    vii. Ƙwai

    viii. Ruwa

    ix. Tarugu

    x. Tattasai

    Da farko za a samu dankalin a wanke  shi a fere , sai a sake wankewa karo na biyu. Sai a yayyanka shi tsattsaye a aje shi gefe guda. Daga nan za a dafa shi sama-sama, kar a bar shi ya nune sosai. Idan an sauke za a tace da kwando. Daga nan sai a jajjaga tattasai da tarugu a saka kayan yaji a ciki da ɗan magi da gishiri, sai a fashe ƙwai tare da kayan jajjagen a ciki. Kada a saka magi fari ko yaji su yi yawa. Za a sanya su ne daidai gwargwado. Daga nan sai a kawo dankalin nan a zuba a cikin ƙwan, sai a ri ƙ a ɗiba ana soyawa tare da ruwan ƙwan nan a hankali. idan sun soyu, za su ri ƙ a ha ɗ ewa wuri ɗ aya.

    The book “Cimakar Bahaushe” (Diets of the Hausa People) is a collection of 293 traditional and modern diets of the Hausa people. Detailed explanations of the recipes and ingredients are provided. Comments are provided on the areas of the Hausa land where specific diets are mostly found, the age categories of people that usually use it, as well as the scientific impact of some of the diets to human biology. Data is collected from interviews with different categories of people including: i. Food sellers within the Hausa land: Mainly to have an idea of recipes on the diets. ii. People of older age: Mainly to have insights on traditional diets of the Hausas. iii. Hausa scholars: Mainly to verify and justify the validity of the information obtained as well as provide further expert explanations on the diets. Moreover, over two hundred (200) pieces of literature were reviewed to have better insight on the topic in question as well as get scientific and professional clarifications on some key concepts relevant to the research. The pieces of literature cover major relevant phenomena such as diet and hunger. Others are on the Hausa land and the Hausas. The book contains thirty-three (33) chapters. Chapter one is the main introduction in which a concise explanation is provided on the Hausas, their history, their land, social life, and transformations due to globalization, acculturation, and modernity. Chapter two detailly discusses the concepts of diet and food from the Hausa point of view. That includes the meaning and the usage of diets in some Hausa works of literature both verbal and written (i.e. prose, poetry, proverbs, etc.). Chapters three and four discuss the sources of Hausa diets and their forms accordingly. Chapters five to seventeen discuss some traditional Hausa diets including hard and soft ones. Chapter eighteen concentrates on the influence of modernity and globalization on Hausa diets. It has been discovered that there have been some significant changes in the Hausa diets ranging from recipes to kitchenettes. Chapters nineteen to thirty-two discuss modern Hausa diets. Some traditional diets are still retained with little modifications, while on the other hand, there are a lot of new ones. Chapter thirty-three discusses “hunger” from the Hausa point of view. The relationship between hunger and food is examined. Additionally, the use of hunger in various Hausa literary works is studied. It is concluded that hunger is like a disease whereby its cure is food. 7th November 2022
    Citation (Manazartar Littafin):   Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

    Get a copy:
    To obtain a copy of this book, kindly send a WhatsApp message to:
    +2348133529736

    You can also write an email to:
    abuubaidasani5@gmail.com
    Posted by
    Tags: ,

    No comments:

    Post a Comment

    ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.

    HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.

    Subscribe to: Post Comments (Atom)
    Copyright ©