𝐓𝐀𝐌𝐁𝐀𝐘𝐀❓
As-Salaam Alaikum. Mutum ne ya tuba daga wani saɓo da yake aikatawa, har
kuma ya yi wa Allaah alƙawarin idan ya sake aikatawa, to zai yi azumin wata guda. Sai
kuma ya sake aikatawan. To ina hukunci?
𝐀𝐌𝐒𝐀❗️
Wa Alaikumus Salaam Wa Rahmatul Laah.
Wannan ya shiga ƙarƙashin abin da ake cewa: An-Nazru
(alwashi), wato mutum ya ɗora
wa kansa wani aiki na ƙarin kusanci ga Allaah, ya mayar da shi wajibi a kansa.
Sai dai kuma malamai sun ce shi An-Nazru ɗin iri-iri ne
1. Nazrul Qurbah Wat-Taa’ah: Shi ne mutum ya ɗora wa kansa wani aiki
daga cikin ayyukan ɗa’a
ga Allaah Ta’aala, kamar sallah ko azumi ko sadaka da makamantan hakan. Wannan ɗin kuma nau’i biyu ne
i. Nazrul-Mutlaq: Shi ne wanda aka yi shi a matsayin godiya
ga Allaah a kan wata ni’ima kawai, ba domin wani dalili ba, kamar ya ce: Azumi
ga Allaah ya wajaba a kaina. A kan irin wannan ne ake saukar da nassoshin da
suka zo a kan yabon masu yin alwashin, kamar maganar Ubangiji Ta’aala
إِنَّ
الْأَبْرَارَ يَشْرَبُونَ مِنْ كَأْسٍ كَانَ مِزَاجُهَا كَافُورًا
عَيْنًا
يَشْرَبُ بِهَا عِبَادُ اللَّهِ يُفَجِّرُونَهَا تَفْجِيرًا
يُوفُونَ
بِالنَّذْرِ وَيَخَافُونَ يَوْمًا كَانَ شَرُّهُ مُسْتَطِيرًا
Lallai mutanen kirki za su sha daga cikakkun kofunan giya wanda
abin gauraya shi kaafuur ne. Wani marmaro ne wanda bayin Allaah suke sha daga
gare shi, suna ɓuɓɓugar da shi ɓuɓɓugarwa. Suna cikawa da alwashinsu kuma suna
tsoron wani yini wanda sharrinsa mai tartsatsi ne. (Surah Al-Insaan: 5-7).
ii. Nazrul-Muqayyad ko Nazrul-Mujaazaat: Shi ne wanda mai
yin sa ya rataya alwashin a ƙarƙashin wani sharaɗi, kamar ya ce: ‘Idan Allaah ya warkar da
mara lafiyana azumin kwana kaza ya hau kai na.’ wannan irin alwashin ake nufi
da nassoshin da suka zo da zargi a kansa kamar wannan
Daga Ibn Umar (Radiyal Laahu Anhumaa) ya ce
نَهَى
النَّبِىُّ - صلى الله عليه وسلم - عَنِ النَّذْرِ قَالَ « إِنَّهُ لاَ يَرُدُّ شَيْئًا
، وَإِنَّمَا يُسْتَخْرَجُ بِهِ مِنَ الْبَخِيلِ » .
Annabi (Sallal Laahu Alaihi Wa Alihi Wa Sallam) ya hana yin
alwashi, ya ce: ‘Ba ya mayar da komai (na ƙaddara), kaɗai
da shi ake fitarwa daga marowaci.’ (Sahih Al-Bukhaariy: 6608).
2. Nazrul Ma’asiyah: Kamar wanda ya yi alwashin aikata wani
saɓo, kamar shan
giya ko yin zina ko sata, ko yin azumi a ranar Idi ko kuma yin yanka ko zuba
gari a kan ƙabari, da sauransu. Hadisi daga A’ishah (Radiyal Laahu Anhaa), daga Annabi (Sallal Laahu
Alaihi Wa Alihi Wa Sallam) ya ce
« مَنْ
نَذَرَ أَنْ يُطِيعَ اللَّهَ فَلْيُطِعْهُ ، وَمَنْ نَذَرَ أَنْ يَعْصِيَهُ فَلاَ يَعْصِهِ
»
Wanda ya yi alwashin zai yi wa Allaah ɗa’a, to ya yi masa ɗa’a. Wanda kuma ya yi
alwashin zai saɓa wa
Allaah, to kar ya saɓa
masa. (Sahih Al-Bukhaariy: 6696).
3. Nazrul Lijaaj Wal-Ghadab: Shi ne ya yi alwashin a cikin
fushi ko a lokacin husuma, kamar ya rataya alwashin a kan wani sharaɗi da nufin hana kansa
aikata wani abu ko ɗora
shi a kan aikata wani abu, kamar ya ce: ‘Idan na aikata abu kaza zan yi azumin
wata ko shekara’, ko ya ce: ‘Idan ban aikata abu kaza ba zan bayar da dukiyata
sadaka saboda Allaah.’ Ka ga wannan ba nufin shi yin azumi ko sadaka ba ne.
Manufarsa kawai ya ɗora
kansa ne a kan aikata abin, ko kuma hana kansa aikata abin da ya faɗa.
Malamai sun ce
•
Hukuncin irin wannan alwashin shi ne hukuncin rantsuwar da aka rataya ta a kan
wani sharaɗi, yana da
daman zartar da alwashin, ko kuma ya bar ta ya yi kaffarar rantsuwa. Wannan ne
zaɓin
Shaikhul-Islaam Ibn Taimiyah a cikin Majmuu’ul Fataawaa: 35/253.
•
Riwaya ta tabbata daga Sahabi Abdullaah Bn Abbaas (Radiyal Laahu Anhumaa) ya
ce:
« مَنْ
نَذَرَ نَذْرًا لَمْ يُسَمِّهِ فَكَفَّارَتُهُ كَفَّارَةُ يَمِينٍ ، وَمَنْ نَذَرَ
نَذْرًا فِى مَعْصِيَةٍ فَكَفَّارَتُهُ كَفَّارَةُ يَمِينٍ ، وَمَنْ نَذَرَ نَذْرًا
لاَ يُطِيقُهُ
فَكَفَّارَتُهُ
كَفَّارَةُ يَمِينٍ ، وَمَنْ نَذَرَ نَذْرًا أَطَاقَهُ فَلْيَفِ بِهِ
».
Wanda ya yi wani alwashin da bai ambaci sunansa ba, to
kaffararsa ita ce kaffarar rantsuwa. Kuma wanda ya yi alwashi a cikin saɓon Allaah, to kaffararsa
ita ce kaffarar rantsuwa. Kuma wanda ya yi alwashin da ya kasa iya zartar da
shi, to kaffararsa ita ce kaffarar rantsuwa. Kuma wanda ya yi alwashin da yake
iya zartar da shi, to lallai ya cika alwashinsa. (Sunan Abi-Daawud: 3324).
•
Kaffarar rantsuwa kuwa ita ce a cikin maganar Ubangiji Tabaaraka Wa Ta’aala
لَا يُؤَاخِذُكُمُ
اللَّهُ بِاللَّغْوِ فِي أَيْمَانِكُمْ ، وَلَـــكِنْ يُؤَاخِذُكُمْ بِمَـــا عَقَّدْتُمُ
الْأَيْمَانَ ، فَكَفَّارَتُهُ إِطْعَامُ عَشَرَةِ مَسَاكِينَ مِنْ أَوْسَطِ مَــا
تُطْعِمُونَ
أَهْلِيكُمْ أَوْ كِسْوَتُهُمْ أَوْ تَحْرِيرُ رَقَبَةٍ ، فَمَـــنْ لَمْ يَجِدْ فَصِيَامُ
ثَلَاثَةِ أَيَّامٍ . ذَلِكَ كَفَّارَةُ أَيْمَانِكُمْ إِذَا حَلَفْتُمْ ، وَاحْفَظُوا
أَيْمَانَكُمْ
، كَذَلِكَ يُبَيِّنُ اللَّهُ لَكُمْ آيَاتِهِ لَعَلَّكُمْ تَشْكُرُونَ
Allaah ba ya kama ku a kan rantsuwoyi na wargi, amma dai
yana kama ku ne a kan rantsuwar da kuka ɗaura
zuciya a kanta. To kaffararta: Ciyar da musakai guda goma ne daga matsakaicin
abin da kuke ciyar da iyalinku, ko tufatar da su, ko kuma ’yanta baiwa. Wanda
kuma bai samu iko ba, to sai ya yi azumin kwanuka uku. Wannan ne kaffarar
rantsuwoyinku idan kun karya rantsuwoyin. Sai ku tsare rantsuwoyinku. Kamar
haka ne Allaah yake yi muku bayanin ayoyinsa ko kwa gode masa. (Surah
Al-Maa’idah: 89).
Don ƙarin bayani ana iya duba Tamaamul Minnah: 4/380-388.
Allaah ya ƙara mana ilimi mai amfani.
WALLAHU A'ALAM
Sheikh Muhammad Abdullaah Assalafiy
Ga masu tambaya sai su turo ta WhatsApp number: 08021117734
Zauren Fatawoyi Bisa Alkur'ani Da Sunnah. Ku kasance Damu...
𝐖𝐇𝐀𝐓𝐒𝐀𝐏𝐏👇
https://whatsapp.com/channel/0029VaA8YpB42DcZdoRuCj3G
𝐅𝐀𝐂𝐄𝐁𝐎𝐎𝐊👇
Https://www.facebook.com/groups/336629807654177
𝐓𝐄𝐋𝐄𝐆𝐑𝐀𝐌👇
https://t.me/TambayaDaAnsa
ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ
**************************
Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.
No comments:
Post a Comment
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.