Yadda Ake Kosen Wake Da Kosen Rogo

Ƙosen Wake

Kayan haɗin ƙosen wake:

i. Albasa         

ii. Gishiri        

iii. Mai             

iv. Ruwa

v. Tarugu       

vi. Tattasai      

vii. Wake

Za a jiƙa wake, sannan a surfe a wanke shi tare da cire hancinsa. Idan da dare ne, za a baza shi a faifayi ko a wani masaki mai faɗi kafin gari ya waye, gudun kada ya yi tsami. Daga zarar gari ya waye, sai a ɗauraye shi da ruwa mai tsabta. Daga nan za a gyara tarugu da tattasai da albasa a yanka a sanya a cikinsa. Za a iya sanya tafarnuwa idan ana buƙata. Da zarar wannan ya samu, sai maganar markaɗawa bisa dutsin niƙa ko kuma injin markaɗe.

Bayan an markaɗa, za a zuba a ƙwarya ko wani mazubi, sannan a sanya gishiri a yi ta burgawa har sai ya gaurayu sosai. A gefe guda kuma, za a ɗora kasko bisa wuta a zuba man gyaɗa. Daga nan za a riƙa ɗibar ƙullun nan kaɗan-kaɗan ana zubawa a cikin mai. Yayin da gefe guda ya soyu, sai a juya ɗaya gefen da tsinke ko wani abu mai kama da shi ta yadda shi ma ɗaya gefen zai soyu sosai. Da zarar ya soyu, ƙosai ya samu ke nan. Ana cin ƙosai da yajin barkono ko na ƙuli.

Ƙosen Rogo

Kayan haɗin ƙosen rogo:

i. Albasa         

ii. Gishiri         

iii. Rogo

iv. Ruwa         

v. Tarugu

Za a niƙa rogo a tankaɗe a kwaɓe shi da ruwan ɗumi, sannan a saka gishiri da albasa da tarugu waɗanda aka jajjaga. Daga nan za a riƙa cuccurawa daidai yadda ake buƙata, sai kuma a soya shi irin yadda ake soya ƙosen wake, wanda bayanin yadda ake yin sa ya gabata a ƙarƙashin 13.8 da ke sama.

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com