Farkon Abunda Allah Ya Fara Halitta

𝐓𝐀𝐌𝐁𝐀𝐘𝐀❓

Assalamualaikum waramatullahi wabarakatuhu barka da safeya muna fatan antashe lafiya Allah yasa haka ne. Mallam tambayar mu da mutum da duniya da duwatsu wanne Allah ya fara haltta, Da ayar da Allah yayi magana akai?

𝐀𝐌𝐒𝐀❗️

Wa'alaikumus Salam Warahmatullahi Wabarkatuhu.

Farkon abin da Allah ya halitta daga cikin abubuwan da aka sani shi ne Al’arshinsa, wanda ya tashi bayan ya halicci sammai, kamar yadda Allah (تعالى) yake cewa

وَهُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ وَكَانَ عَرْشُهُ عَلَى الْمَاءِ لِيَبْلُوَكُمْ أَيُّكُمْ أَحْسَنُ عَمَلًا

"Kuma Shi ne wanda Ya halicci sammai da kasa a cikin kwanaki shida, kuma Al'arshinSa ya kasance a kan ruwa, domin Ya jarraba ku, wane ne daga cikinku ya zama mafi alherin aiki" (suratul Huud Aya ta 7).

Wasu kuma su ka ce Ruwa shi ne farko, kamar yadda aka tambayi Manzon Allah sallallahu alayhi wa sallam, yadda duniya ta fara, sai ya ce

« كان الله ولم يكن شىء غيره وكان عرشه على الماء وكتب في الذكر كل شىء ثم خلق السماوات والأرض »

«Allah ya wanzu kuma babu wani abu a tare da shi. Ya halicci Al'arshi [Ya sanya shi] a saman ruwa. Sa'an nan kuma (Ya umurci Alƙalami ya rubuta) a cikin Alƙur'ani, dukan abin da zai auku. Sai Allah ya halicci sammai da ƙasa.» [Bukhariy ya rawaito shi]

Annabi tsira da aminci su tabbata a gare shi, ya amsa wannan tambayar da fara bayyana cewa samuwar Allah ba ta da mafari, watau shi ne madawwami. Babu wanda aka jingina shi da dawwama face Shi. Watau babu abin da ya wanzu sai Allah, kuma Allah ne ya halicci komai, watau ya fitar da dukkan halitta daga babu, subhanallahu wata ala.

Allah, bai halicci dukan halittu a lokaci guda ɗaya ba. Kuma da Ya so wannan da ta auku. Amma sai ya yi hakan a cikin kwanaki shida, Ya halitta sammai da ƙasa. Kuma acikin Duniya Allah ya halicci koguna da duwatsu da kwaruruka. Wanda hikimar wannan ita ce koya mana kada mu yi gaggawar acikin al'amuran mu. Annabi Sallallahu Alaihi Wasallama ya ce:

إِنَّ اللهَ تَعَالَى خَلَقَ كُلَّ شَيْءٍ مِنَ الْمَاءِ

«Allah ya halicci komai daga ruwa.» [Ibn Hibban ne ya rawaito shi]

Wannan kuma yana nufin Allah ya halicci ruwa kafin ya halicci haske, da duhu, da ƙasa, da sama, da Al'arshi, da Allo mai tsaro. Allah ya sanya ruwa ya zama tushen sauran halittu. Ya halitta Al'arshi daga ruwa. Sa'an nan kuma Ya halicci Alƙalami kudra, sa'an nan kuma littafin da ke ɗauke da ayyukan bayi. Bayan waɗannan halittu, sai Allah ya halicci sauran halittu: irin su kasa, sammai, dabbobi, duwatsu, bishiyoyi, koguna. Adam, tsira da amincin Allah su tabbata a gare shi, ya kasance daga nau’in halittun Allah na karshe, karshe, wato mutane.

Akwai sauran bayanai da hujjoji na malamai da yawa, Kuma Allah ne mafi Sani.

Zauren Fatawoyi Bisa Alkur'ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.