28 Ga Watan Fabarairu Ce Rana Ta Karshe A Bikin Kamun Kifi Da Wasannin Al'adun Gargajiya Na Argungu Na Shekarar 1981

Manyan baƙi daga ciki da wajen Nijeriya ne suka haɗu da sauran jama'ar da Allah ya amincewa, ciki kuwa har da mai wannan rubutu a "Matan Fada" dake garin Argungu inda nan ne babbar fadar Kabawa a duk inda suke cikin duniya tun da Sarkin Kabi Yakubu Nabame ya ƙirƙire ta a cikin 1840s, domin shedar kawo ƙarshen gasar bikin kamun kifi da wasannin al'adun gargajiya na Argungu (Argungu Fishing & Cultural Festival) na shekarar 1981, a ranar 28/02/81.

Bikin ya samo asali ne a shekarar 1934, lokacin da Marigayi Mai Alfarma Sarkin Musulmi Hassan ɗan Sarkin Musulmi Mu'azu ɗan Sarkin Musulmi Muhammadu Bello ɗan Mujaddadi Shehu Usman Ɗanfodio tagammadahullah birahamatihi da ya yi Sarauta daga shekarar 1931 zuwa 1938 ya samu amincewar Marigayi Mai Martaba Sarkin Kabin Argungu Muhammadu Sani (ya yi Sarauta daga shekarar 1934 zuwa shekarar 1942) ya zo Argungu ziyarar sada zumunci da gyaran zamantakewa tsakanin Masarautunsu( Sokoto da Argungu) saboda lamurran da suka faru tsakaninsu a can baya.

Domin ƙawata wannan ziyarar ne Marigayi Mai Martaba Sarkin Kabin Argungu, Muhammadu Sani ya shirya bikin al'adun gargajiya na Kabawa, ciki kuwa har da kamun kifi wanda daga nan ne aka haifi wannan ƙasaitaccen biki na ƙasa da ƙasa da ake kira "Argungu Fishing & Cultural Festival a turance ya zuwa yau.

A wannan rana ta 28/02/1981 ne, a gaban Marigayi Mai girma Mataimakin Shugaban Ƙasar Tarayyar Nijeriya na wancan lokacin, Dr. Alex Ekwueme da tsofafin Gwamnonin Jihohin Kano da Rivers, Marigayi Alhaji Mohammed Abubakar Rimi da Marigayi Cif Melford Okilo da mai masaukin baƙi, tsohon Gwamnan Jihar Sakkwato, Marigayi Alhaji Shehu Mohammed Kangiwa (Turakin Kabi) da manyan Sarakuna da sauran muhimman mutane, Malam Maidamma Ɗan Dare daga Ƙaramar Hukumar Mulkin Birnin Kebbi ya zamo zakara a gasar da kama kifi mafi girma.

Ya samu nasarar kama kifin da ya yi kimanin kilo 70 a wannan rana. Aka gwangaje shi da kyautar Naira dubu ɗaya (#1, 000.00) da Babur ƙirar Honda Belly sabo da kujerar aikin Hajji da agogon hannu da kuma bandur na yadi guda ɗaya.

An samu ƙarin bayani daga Mujallar Zaruma, A Cultural Magazine of Sokoto State, February, 1982.

Ibrahim Muhammad Ɗanmadamin Birnin Magaji, Jihar Zamfara, Nijeriya.
08149388452, 08027484815.
birninbagaji4040@gmail.com
Asabar, 27/07/2024.