Hasarar Doki Sai Sarki

Wannan wata karin magana ce da ta samu a Tsohuwar Daular Zamfara a lokacin mulkin Sarkinta na 30, watau Sarki Yakuba ɗan Sarkin Zamfara na 29 Babba ɗan Sarki Muhammadu na Makake.

Sarki Yakuba ɗan Babba wanda ya yi mulki a cikin 1720s jarumin gaske ne da ya yi yaƙe- yaƙe ya kuma samu gagarumar nasara. A lokacinsa ne karen Daular Zamfara ya kai tsaiko. Sarki ne mai kwarjini ga jama'arsa domin jarunta da kyautatawarsa zuwa gare su.

Wata rana wani Ba'azbine ya taso daga Ƙasarsu, Azbin da Doki zuwa Birnin Zamfara domin ya kawo wa Sarkin Zamfara Yakuba ɗan Babba ya siya. Bisa ga ƙaddara sai doki ya mutu kafin Ba'azbinen ya iso Birnin Zamfara.

Ba'azbine ya ciro ragamar dokin ya ci gaba da tafiya har sai da ya iso Birnin Zamfara. Aka yi masa iso a wajen Sarki, ya faɗi ya yi gaisuwa ya kuma sanar da Sarki labarinsa. Sarki Yakuba ɗan Babba ya tambaye sa "ina ragamar dokin? Ba'azbine ya ce ga ta a hanunsa.

Sarki Yakuba ya umurci Sarkin Zaginsa da ya karɓi ragamar ya shiga a Bargar Dawakinsa ya dinga gwada ta akan dawakin, duk dokin da ta yi wa daidai ya zo ya sanar dashi.

Bayan wani lokaci Sarkin Zagi ya fito daga Barga ya gayawa Sarki cewa an samu dokin da ragamar ta yi wa daidai. Sarki ya tambaye sa nawa ne aka siyo wannan dokin? Sarkin Zagi ya ce bawa ashirin da biyar aka siyo shi. Sarki ya ce akai Ba'azbine masauki har zuwa gobe.

Kashegari Sarki ya sa aka zo da Ba'azbine da ragamar dokinsa a gabansa. Ya ce a bashi bawa ashirin da biyar ya yi niyya ya koma Ƙasarsu ya na mai cewa "Ai hasarar doki sai Sarki". Daga wannan lamarin ne aka samu karin magana a Daular da ake cewa "Hasarar Doki sai Sarki". Allah ya jiƙan magabatanmu, ya sa mu wanye lafiya, mu cika da kyau da imani, ya yalwata bayanmu, amin.

Ibrahim Muhammad Ɗanmadamin Birnin Magaji, Jihar Zamfara, Nijeriya.
08149388452, 08027484815
birninbagaji4040@gmail.com
Alhamis, 11/07/2024
Ƙarfe 11:52 na dare.