Hukuncin Wanda Matarsa Ta Yi Masa Istimna'i

𝐓𝐀𝐌𝐁𝐀𝐘𝐀❓

Assalamu alaikum malam, idan matar mutum ta biya masa bukatar sha'awarsa ta hanyar amfani da hannunta ko bakinta, shima istimina'i ne? Kuma shima akwai laifi agun Allah?? (DAGA L. M HASHIM).

𝐀𝐌𝐒𝐀❗️

Wa alaikumus salam wa rahmatulLahi wa barakatuhu.

Addinin Musulunci ya yarda mutum yayi duk wani wasa da matarsa ko lokacin da take cikin tsarki, ko alokacin da bazai yiwu ya sadu da ita ba, sanadiyyar jinin haila ko biqi ko wata larurar.

Kuma don mutum yayi inzali a irin wannan yanayin babu wani laifi akansa. Mutum dai bai sadu da ita ta dubura ba, ko acikin jinin haila.

Game da sanya al'aura a baki kuwa, akwai saɓani atsakanin Malamai. Yayin da wasu maluman suke ganin haramcin hakan, wasu kuma sun ce ya halatta.

Waɗanda suka ce bai halatta ba, sun kafa hujjah ne da cewar shi bakin ɗan Adam an halicceshi ne domin cin abinci ko shan abin sha, ko ambaton Allah. Amma ba'a yishi domin ya zama kafar saduwa atsakanin Ma'aurata ba.

Kuma sun ce alokacin da ma'aurata ke tsotsar al'aurar junansu, lallai ne sai an samu fitar maziyyi wanda shi babu saɓani atsakanin maluma bisa cewar najasa ne, hukuncinsa ɗaya da fitsari. Kuma haramun ne musulmi ya haɗiye najasa..

Hujjarsu ta uku kuma sun ce shi dai matse-matsin ɗan Adam ko kuma al'aurarsa waje ne da ya zamto matattarar kwayoyin cututtuka. Shi kuma bakin ɗan Adam yakan zamto kamar mashigar cutuka ayawancin lokuta idan aka aiwatar dashi ba bisa Qa'idah ba. Kuma sau da yawa ana samun fitar kuraje da sauran cutuka acikin bakuna ko harasan ma'auratan dake aikata wannan. Kuma yazo acikin mashahurin hadisi cewa "BABU CUTA KUMA BABU CUTARWA". Wato kada ka cuci wani, kuma kada ka jefa kanka cikin abinda zaka cutu.

Maluman dake ganin halascin tsotsar al'aura atsakanin Ma'aurata, sun kafa hujjah da cewa ai Allah da Annabinsa bai haramta yin haka acikin Alqur'ani ko hadisi ba, Kuma duk abinda ya zamto haramun ne an riga anyi bayaninsa acikin Alqur'ani da Sunnah kamar yadda muka bayyana abaya...

Kuma sun kafa hujjar cewa ya halatta Ma'aurata su aikata duk wani abinda zai Qara musu nishaɗi yayin saduwarsu mutukar dai Allah bai haramtashi ba.

Don haka idan ma'aurata suka yi wasa da juna har yakai ga an samu inzali, wato fitar maniyyi, ba haramun bane. Abinda aka haramta shine mutum ya aikata hakan da kansa.

WALLAHU A'ALAM.

DAGA ZAUREN FIQHU 07064213990

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.