Sharuddan Tuba

𝐓𝐀𝐌𝐁𝐀𝐘𝐀❓

Shin Mallam Yaya Mai Yawan Saɓon Allah Zai Kyautata Halinsa? kuma menene sharuddan tuba?

𝐀𝐌𝐒𝐀❗️

Babu shakka saɓon Allah abune dake haifarwa da bawa matsaloli masu yawa, amma kuma Allah mai yalwar falalane matukar mutum yayi nadama yagane kuskurensa ya tuba to lallai Allah mai yawan gafarta zunubaine, Allah maɗaukakin sarki yace

...وَتُوبُوا إِلَى اللَّهِ جَمِيعًا أَيُّهَ الْمُؤْمِنُونَ لَعَلَّكُمْ تُفْلِحُونَ

Kuma ku tũba zuwa ga Allah gabã ɗaya, yã ku mũminai! Tsammãninku, ku sãmi babban rabo. (Suratul Nur Aya ta 31)

Allah yasake cewa

قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِنْ رَحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ

Ka ce: (Allah Ya ce): "Yã bãyĩNa waɗanda suka yi ɓarna a kan rãyukansu! Kada ku yanke ƙauna daga rahamar Allah. Lalle Allah na gãfarta zunubai gabã ɗaya. Lalle Shĩ, Shĩ ne Mai gãfara, Mai jin ƙai." (Suratul zumar:l Aya ta 53)

Kalmar tuba tana da girma da dalililai masu zurfi, ba kamar yanda wasu dayawa suke ɗauka ba, kawai ka furta da harshe kuma kaci gaba da aikata laifuka, ka lura ka kula da fadar Allah maɗaukakin sarki

وَأَنِ اسْتَغْفِرُوا رَبَّكُمْ ثُمَّ تُوبُوا إِلَيْهِ...

Kuma ku nẽmi gãfara gun Ubangijinku. Sa'annan ku tũba zuwa gare Shi...(suratul Hud Aya ta 3)

zakasamu a wannan aya cewa shi tuba wani al'amarine dayake karuwa ta hanyar neman gafarar ubangiji. Kuma saboda duk wani babban al'amari zaka sameshi yana da sharudda saboda haka malamai suka ambaci sharuddan tuba, waɗanda suka dakko daka Alqur'ani da hadisai

1. Barin zunubi da gaggawa.

2. Yin dana sani akan abunda ka riga ka aikata na laifuka.

3. Qudurta niyyar bazaka sake komawa wannan laifi ba.

4. Maida hakkin wanda ka zalunta, ko barranta daka azzallumai idan da kaine kake taimaka musu.

Bayan waɗannan kada mutum ya manta dawasu al'amuran nadaban waɗanda sunada mahimmanci kwarai wajen tabbatuwar tuba nagartacce,

1. Yazamto dan Allah mutum yatuba daka zunubi, badan wani abu yabar laifin ba kodan bashi da ikon aikata laifin, ko kuma kabar zunubi dan tsoran maganar mutane, ba tuba bane wanda yabar zunubi dan kare mutuncinsa wajan mutane, ko dan bashi da iko, ko dan kare lafiyarsa daka wata cuta da'ake samu daka zunubin, ba'a kiran wanda yabar cin hanci ko karɓar rashawa dan yana tsoran kada akamashi yasha tozarci, haka wanda yabar zina dan kada yaɗau cutukan datake haifarwa, komai shangiyar dayabar shanta dan illolin datake haifarwa, ko barawon dabashi da ikon yinsata ko danfashin darashin samun dama ce tasa ya tuba, duk wani laifi indai badan tsoran ukubar da Allah yatanadar akai ba ka tuba daka gareshi, to bakayi tuba wanda Allah yakeso ba.

2. Wajibine ka dunga jin bakin ciki duk lokacin da katuno aikin zunubin daka aikata abaya da kuma illarsa. Ana nufin tuba ingantacce baya yiwuwa tare dakana jin daɗin abunda ka aikata abaya inkatuna, koma kadunga burin inama kasake komawa nan gaba.

Ibnul qayyeem acikin littafinsa Adda'u waddawa'a yakoro bayani akan illar zunubi da kuma cutukan dayake haifarwa, daka ciki yace

Haramtawa mutum ilmi, zunubi nasa kakasa samun nagartaccen ilmi ko kasamu ilmin amma mara amfani, rashin kwanciyar hankali, Kuncin al'amura, cutar jiki, zunubai nasanya Allah yahanawa ɗan adam ikon aikata abunda yake biyayyah ne ga Allah, dakuma rashin albarka arayuwa, da karancin dacewa cikin duk abunda mutum zaiyi, da kuncin rai, da zakkewa zunubai, dakuma aikata kananun laifuka, Bakin cikin mai zunubi game da Allah da bakin cikinsa da mutane, da tsinuwar da dabbobi zasu dunga yi masa, da rigar kaskanci dazai shiga, da bushewar zuciya dashiga karkashin la'anta, dakin amsa addu'arsa, da aikata ɓarna afili da ɓoye, da rashin kishi, da gushewar kunya atare da mutum, da gushewar ni'imomi, dasaukar bala'i da saukar datsoro da firgici azuciyar mai saɓo, dafadawa cikin tawagar Shaiɗan da mummunan karshe da kuma azaba alahira.

Inkasan waɗannan illoli na zunubi zaisa kabar aikata laifi gaba ɗaya, domin wasu mutane idan suka bar laifi saisu koma wani wanda aganinsu ma'aunin su ba ɗaya bane da wanda suka bari, suna ɗaukar yafi sauki sauki akan wanda suka daina sauki.

Bayan duk kabi matakan tuba idan kanada wasu abokai da kuke aikata wannan zunubi wajibine ka canjasu da wasu, domin dayawa mutum kan tuba daka zunubi amma sanadiyyar rashin rabuwa dawanda suke aikata laifin tare sai mutum yakoma yasake fadawa cikin ɓata sama dawanda yake abaya, ko gurine ko majalisa dakake tasirantuwa da ita wajibine ka kaurace mata kacanza dawata wacce zaka samu ingantuwar tubanka da imaninka, kasamu abokai nagari masu addini waɗanda koda basu umarceka da kyakkyawa ba zaka tasirantu dasu wajan aikata mai kyau kaima.

Ka yaiwata aikata kyawawan ayyuka domin kyawawan ayyuka suna share munana. Allah maɗaukakin sarki acikin suratul Furqaan bayan jero dangin manyan zunubai wanda muminai nagari basa aikatawa kuma duk wanda ya aikata su za'a rufanya masa azaba saiyace

إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا

Sai wanda ya tũba, kuma ya yi ĩmãni, kuma ya aikata aiki na ƙwarai to, waɗancan Allah Yanã musanya miyãgun ayyukansu da mãsu kyau. Allah Ya kasance Mai gãfara Mai jin ƙai. (Suratul Furqan Aya ta 70)

Muna rokon Allah ya shiryar damu zuwa ga abunda yakeso kuma ya yarda dashi, yakarbi tuban mu gaba ɗaya domin shi mai yawan karbar tuba ne mai jinkai.

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.