Ta’aziyyar Karamin Yaro

𝐓𝐀𝐌𝐁𝐀𝐘𝐀❓

As-Salaam Alaikum Wa Rahmatul Laah. Wai yaya ake yin ta’aziyyar yaro ƙarami ne wanda alƙalami bai hau kansa ba?

TA’AZIYYAR ƘARAMIN YARO:

𝐀𝐌𝐒𝐀❗️

Wa Alaikumus Salaam Wa Rahmatul Laah Wa Barakaatuh.

Da farko, malamai sun yarda cewa, mustahabbi ne a yi wa ƙaramin yaro sallah ta jana’iza, saboda maganar Manzon Allaah (Sallal Laahu Alaihi Wa Alihi Wa Sallam) cewa:

«وَالسِّقْطُ يُصَلَّى عَلَيْهِ، وَيُدْعَى لِوَالِدَيْهِ بِالْمَغْفِرَةِ وَالرَّحْمَةِ»

Jaririn da aka yi ɓarin shi [a wata riwaya: ƙaramin yaro] ana yi masa sallah, kuma a roƙa wa iyayensa gafara da rahama. (Abu-Daawud: 3180, da At-Tirmiziy:1031, da Ibn Maajah: 1507 suka riwaito shi, kuma Al-Albaaniy ya sahhaha shi).

A nan sai aka keɓance iyayensa da addu’ar neman gafara da rahama. Domin kamar yadda malaman suka ce: Yaro ƙarami ba a fara rubuta masa laifi ba, balle har a je nema masa gafara a kansu.

A cikin bayanin Sallar Jana’iza Al-Imaam Ibn Ƙudaamah ya ambaci cewa:

(1563) فَصْلٌ: وَإِنْ كَانَ الْمَيِّتُ طِفْلًا، جَعَلَ مَكَانَ الِاسْتِغْفَارِ لَهُ: اللَّهُمَّ اجْعَلْهُ فَرَطًا لِوَالِدَيْهِ، وَذُخْرًا وَسَلَفًا وَأَجْرًا، اللَّهُمَّ ثَقِّلْ بِهِ مَوَازِينَهُمَا، وَأَعْظِمْ بِهِ أُجُورَهُمَا، اللَّهُمَّ اجْعَلْهُ فِي كَفَالَةِ إبْرَاهِيمَ وَأَلْحِقْهُ بِصَالِحِ سَلَفِ الْمُؤْمِنِينَ

Fasali: Idan kuma mamacin yaro ne ƙarami, a maimakon istighfari sai a musanya da cewa: Ya Allaah! Ka sanya shi ya zama magabaci, da guzuri, kuma da lada ga iyayensa. Ya Allaah! Ka nauyaya mizaninsu da shi, kuma ka girmama ladansu da shi. Ya Allaah! Ka sanya shi a cikin kulawar Annabi Ibrahim, kuma ka sada shi da magabata na ƙwarai daga cikin muminai. (Al-Mughnee: 2/365).

Amma a wurin ta’aziyya, mafi kyau shi ne lafazin da Annabi (Sallal Laahu Alaihi Wa Alihi Wa Sallam) ya yi amfani da shi, a lokacin da ya aika wa ‘yarsa da hakan a sakamakon rasuwar ɗanta:

«إِنَّ لِلَّهِ مَا أَخَذَ، وَلَهُ مَا أَعْطَى، وَكُلُّ شَيْءٍ عِنْدَهُ بِأَجَلٍ مُسَمًّى، فَلْتَصْبِرْ وَلْتَحْتَسِبْ»

Haƙiƙa! Na Allaah ne abin da ya karɓa, kuma nasa ne abin da ya bayar. Kuma komai a wurinsa da ma yana da ajali ne ambatacce. Don haka sai ta yi haƙuri kuma ta nemi sakkayar Allaah. (Sahih Al-Bukhaariy: 1284).

A nan ma bai yi batu a kan nema wa jaririn gafara ba.

Idan kuma an buƙatu ga yi wa mamacin addu’a a wurin ta’aziyyar domin daɗaɗawa da farantawa ga iyayensa da sauran makusanta - kamar yadda aka saba - to, sai a maimaita waɗancan addu’o’in da aka yi a wurin sallar jana’izarsa.

Su ma dai babu batun neman gafara ga jaririn a cikinsu.

Wal Laahu A’lam.

Sheikh Muhammad abdullaah Asslafiy

+2348021117734

Zauren Fatawoyi Bisa Alkur’ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.