Ya Halatta Mace Ta Yi Taimama Saboda An Daura Mata Lalle?

𝐓𝐀𝐌𝐁𝐀𝐘𝐀❓

Assalamu alaykum. Malam ina wuni? Yaya iyali? ALLAH YA kara maka lfy da nisan kwana, amin. Malam don ALLAH ya halatta wai mace ta yi taimama saboda an ɗaura mata lalle a hannu da kafa kuma a tsakanin salloli guda 2 ? Lalle irin na zamanin nan da ake yanka cellotape ɗin nan (gam). Wasu matan na cewa ai lalle ma sunnah ne. Sai su dinga barin lokutan sallah (farilla) na wuce su. Wasu kuma sukan haɗa salloli ba don komai ba, sai don wai su bari lallen nasu ya kama sosai.

Kuma ya halatta ta yi sallah a zaune in tana da alwala saboda lallen?

Ya Halatta Mace Ta Yi Taimama Saboda An Ɗaura Mata Lalle?

𝐀𝐌𝐒𝐀❗️

Wa alaikis salam wa rahmatullahi wa barakatuhu

Ɗaura lalle ko wani nau’in ado, ba ya cikin uzurarrukan dake halasta wa mutum yin taimama. Idan mace tayi taimama saboda wannan dalilin kuma tayi sallah ahaka, gaskiya sallarta batayi ba. Wajibi ne taje tayi alwala ta sake sallar.

 Hakanan yin sallah azaune saboda wannan dalilin shima bai halatta ba. Yin sallah azaune ta majinyata ne waɗanda bazasu iya yinta atsaye chak, ko kuma atsaye tare da jingino ba. Amma lafiyayyen mutum idan yayi sallar farilla daga zaune, sallar batayi ba. Wajibi ne asake wannan sallar tare da yin istighfari wato neman gafarar Allah saboda wannan gangancin da akayi.

Haɗe salloli biyu mabambanta wannan haramun ne. Babu wani uzurin da zai sa mutum yayi haka. Amma idan akwai karbabben uzuri a shari’ance, ya halatta mutum ya haɗe azahar da la’asar, ko Magriba da isha’i.

Halastattun uzurarrukan nan sun haɗa da tafiya wato balaguro, sai jinya, ko ruwan sama, ko kuma wani aiki daga ayyukan alkhairi waɗanda addini yake umurni da yinsu. Misali kamar yin sulhu atsakanin wasu mutane waɗanda idan ka kyalesu ka tafi yin sallar, zasu iya watsewa ba tare da cimma maslaha ba, to ya halatta ka tsaya ka sulhuntasu sannan kaje kayi azahar ɗinka, koda ta shiga lokacin la’asar babu komai. Saboda hadisin da aka ruwaito cewa Manzon Allah Sallallahu alaihi Wasallam yaje yin sulhu atsakanin wasu mutanen madeena (Banu Amr bn Auf) har lokacin la’asar ya shiga.

Amma jinkirta sallah bisa dalilin wani ado (make up) ko lalle, wannan haramun ne kuma wasa da addini ne.

Allah (SWT) ya faɗa acikin suratu Maryam ayah ta 59:

فَخَلَفَ مِن بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ فَسَوْفَ يَلْقَوْنَ غَيًّا 

"SAI WASU MUTANE SUKA MAYE GURBINSU WAƊANDA KE TOZARTAR DA SALLAH KUMA SUKE BIYEWA SHA’AWOYI, DA SANNU ZASU HAƊU DA ASARA (MAI GIRMA)".

Abdullahi bn Mas’ud yace "GAYYU" sunan wani rami ne mai mutukar zurfi, kuma mai mummunan wari, acikin wutar jahannama acikinsa ne ake azabtar da masu wulakantar da sallolinsu.

Ƙataadah yace "Rami ne acikin wutar jahannama wanda ke kunshe da jini da ruwan gyambo na ‘yan wuta (acikinsa za’a jefa masu haɗe salloli da gangan don son zuciya da lalaci).

Ibnu Jareer ya ruwaito hadisi ta hanyar Abu Umamah cewar yaji daga Manzon Allah Sallallahu alaihi Wasallam makamancin haka.

Sa’eed ibnul Musayyab yace "Sune mutanen dake jinkirta sallar azahar har sai lokacin la’asar ya shiga, ko su jinkirta magriba har sai lokacin isha’i yayi. Ko su jinkirta sallar isha’i sai da asubahi ko su jinkirta asubah har zuwa fitowar rana. Sune wadanda Allah yace zai jefasu acikin gayyu (matattarar jini da ‘diwa da ruwan gyambon ‘yan wuta)".

Sa’ad bn Abi Waƙƙas yace "Na tambayi Manzon Allah Sallallahu alaihi Wasallam game da ayar nan ta cikin Suratul Ma’un inda Allah yake cewa:

فَوَيْلٌ لِّلْمُصَلِّينَ ۝ الَّذِينَ هُمْ عَن صَلَاتِهِمْ سَاهُونَ

 "WAILUN (WATO RAMIN AZABA) YA TABBATA GA MASU SALLAH, WAƊANDA KE RAFKANUWA GA BARIN SALLARSU".

Sai Manzon Allah Sallallahu alaihi Wasallam yace "Ma’anar wannan shine Jinkirtar da sallah daga kan lokutanta.

Allah shi kiyayemu daga afkawa azaba. Allah shi hanar damu baki ɗaya, ya karbi tubanmu Ameen.

WALLAHU A’ALAM.

DAGA ZAUREN FIƘHU 07064213990

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.