‘Yan Bidi’a Nau’i Biyu Ne

Sau da yawa mukan yi zaton cewa; ‘yan bidi’a halakakku ne, kawai da gangan suka saba ma Annabi (saw). A’a, ba haka abin yake ba, a cikinsu akwai wadanda suka nufi bin Annabi (saw); wato bin Alkur’ani da Sunna, amma sai suka kuskure, imma saboda jahilci ko rashin fahimtar Nassi ko shubha ko tawili da kuskure a Ijtihadi, ko wani sababin daban.

Shaikhul Islami ya yi cikakken bayani, inda ya ce:

فالبدع نوعان: نوع كان قصد أهلها متابعة النص والرسول، لكن غلطوا في فهم النصوص، وكذبوا بما يخالف ظنهم من الحديث ومعاني الآيات؛ كالخوارج، وكذلك الشيعة المسلمين، بخلاف من كان منافقا زنديقا يظهر التشيع، وهو في الباطن لا يعتقد الإسلام. وكذلك المرجئة قصدوا اتباع الأمر والنهي، وتصديق الوعيد مع الوعد...

وأما الجهمية النافية للصفات، فلم يكن أصل دينهم اتباع الكتاب والرسول؛ فإنه ليس في الكتاب والسنة نص واحد يدل على قولهم، بل نصوص الكتاب والسنة متظاهرة بخلاف قولهم، وإنما يدعون التمسك بالرأي المعقول.

النبوات لابن تيمية (1/ 423 - 424)

"Bidi’o’i nau’i biyu ne; akwai nau’in da manufar ma’abotansa shi ne Bin Nassin (Alkur’ani) da Bin Manzon Allah (saw), amma sai dai sun yi kuskure wajen fahimtar Nassoshin, sai suka karyata abin da ya saba ma zatonsu na Hadisai da ma’anonin Ayoyin Alkur’ani. Su ne kamar Khawarijawa, da ‘Yan Shi’a Musulmai, sabanin wanda ya kasance Munafuki Zindiki a cikinsu (Rafidha), wanda ya fake da shi’anci, alhali a cikin zuciyarsa bai yarda da Addinin Muslunci ba.

Haka kuma Murji’a, su ma sun nufi bin umurnin Allah da haninsa ne, da gaskata wa’adi da wa’eedi...

Amma Jahamiyya kam (ma’abota bidi’a nau’i ta biyu), wadanda suke kore dukkan siffofin Allah, su asalin Addininsu ba su yi nufin bin Alkur’ani da Manzon Allah (saw) ba. Wannan ya sa babu Nassi guda daya a cikin Alkur’ani da Sunna da yake nuni ga ra’ayinsu. Kai, Nassoshin Alkur’ani da Sunna masu yawa sun saba ma ra’ayoyinsu. Da ma su sun ce: hankali da ra’ayi kawai suka rika".

Saboda haka, ba dadai ba ne ka dauka cewa; duk wani dan bidi’a halakakke ne mai bin son zuciya, wanda ya nufi saba Alkur’ani da Sunna.

Kuma a cikin wannan akwai raddi ga ‘Yan Kungiyar Salafiyyun masu guluwwi a bidi’antarwa, ko masu guluwwi a mu’amala da hukunci ga ‘yan bidi’a.

✍️ Dr Aliyu Muh’d Sani (H)

      14 October, 2018

Daga zauren Dr. Aliyu Muhammad Sani