Yana Kwana A Dakin Kishiyata Alhalin Ba Ranar Kwananta Ba Ne Ba

TAMBAYA (179)❓

Assalama alaikum barka da warhaka malam Allah saka da alkhairi ameeen

Wata makociyata taɗomin da wata mgn daɗu nace ɗanyi tanbaya

Su 2 ne agun mijin tou tunkawo amarya ran aikin amarya sai yaɗiwa uwargidan da bukatar ɗai kwanta da ita sai taki tace bace a ah itakan yabari sai kwananta yaɗo sun sha fada dashi akan haka ammah takiyi

Tou yanɗu sai ran kwanan uwar gida kuma yaje gun amarya tasha fita ran girkinta uwar gida sai ta iskeshi dakin amarya har gidansu taje ita uwar gida akan haka ammah yaki Dena wa Don ita amaryar in yaje gunta ran girkin uwar gida taba hanashi kanta

Yabin yadami uwar gida har yanɗu itama inya ɗo mata ran kwanan amarya itama tafara yada dashi tabar korarsa tou tanbaya anan ɗasu iya ci gaba dahan ko dai tadena yada dashi in ba ran girkintaba. Don Allah muna neman mafita Allah sah mudace ameeen

Yana Kwana A Dakin Kishiyata Alhalin Ba Ranar Kwananta Ba Ne Ba

AMSA❗

Waalaikumus Salam Warahmatullahi Wabarakatuhu

Ya halatta miji ya shiga dakin matarsa yayi mu’amalar auratayya da ita ko da ace baa dakin nata yake ba domin kuwa na farko dai matar shi ce

Domin kuwa munada hadisi cikin Sahihul Bukhari wanda aka rawaito cewar Annabi (Sallallahu alaihi wasallam) ya kasance watarana ya kwana a dakin Hafsat Bintu Umar (Radiyallahu anha) lokacin da ta tafi anguwa sai Annabi ya kira Mariya (Radiyallahu anha) ya kwanta da ita a kan gadon Hafsat

Lokacin da Nana Hafsat ta dawo ta fahimci abinda ya faru sai tayi ta bata rai, har sai da Annabi (Sallallahu alaihi wasallam) ya bata haƙuri yace na haramtawa kaina Mariya (Dayake daman ita Mariya baiwa ce). Nana Hafsat taji dadin wannan mataki da ya dauka takaiwa Nana Aisha rahoto sukaita jin dadi, nan take Allaah (Subhanahu wata’ala) ya saukar da ayar:

( يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ ۖ تَبْتَغِي مَرْضَاتَ أَزْوَاجِكَ ۚ وَاللَّهُ غَفُورٌ رَّحِيمٌ )

التحريم (1) At-Tahrim

Yã kai Annabi! Don me kake haramta abin da Allah Ya halatta maka, kanã nẽman yardar mãtanka, alhãli kuwa Allah Mai gãfara ne, Mai jin ƙai.

Daganan sai Annabi (Sallallahu alaihi wasallam) yayi kaffarar wannan rantsuwar domin cika umarnin Allaah Azzawajallah inda yace:

( قَدْ فَرَضَ اللَّهُ لَكُمْ تَحِلَّةَ أَيْمَانِكُمْ ۚ وَاللَّهُ مَوْلَاكُمْ ۖ وَهُوَ الْعَلِيمُ الْحَكِيمُ )

التحريم (2) At-Tahrim

Haƙĩƙa Allah ya faralta muku warware rantsuwõyinku, kuma Allah ne Mataimakinku kuma shĩ ne Masani, Mai hikima.

Allaah Azzawajallah ya bamu labarin abinda ya faru ƙarara Kamar haka:

( وَإِذْ أَسَرَّ النَّبِيُّ إِلَىٰ بَعْضِ أَزْوَاجِهِ حَدِيثًا فَلَمَّا نَبَّأَتْ بِهِ وَأَظْهَرَهُ اللَّهُ عَلَيْهِ عَرَّفَ بَعْضَهُ وَأَعْرَضَ عَن بَعْضٍ ۖ فَلَمَّا نَبَّأَهَا بِهِ قَالَتْ مَنْ أَنبَأَكَ هَٰذَا ۖ قَالَ نَبَّأَنِيَ الْعَلِيمُ الْخَبِيرُ )

التحريم (3) At-Tahrim

Kuma a sã’ilin da Annabi ya asirta wani lãbãri zuwa ga sãshen mãtansa, to, a lõkacin da ta bã da lãbari da shi. Kuma Allah Ya bayyana shi a gare shi, ya sanar da sãshensa kuma ya kau da kai daga wani sãshe. To, a lõkacin da ya bã ta lãbãri da shi, ta ce: "Wãne ne ya gaya maka wannan?" Ya ce: "Masani, Mai labartãwa, Ya gaya mini."

Daganan sai Allaah Azzawajallah ya ce musu (Hafsat da Aisha - Radiyallahu anhum):

( إِن تَتُوبَا إِلَى اللَّهِ فَقَدْ صَغَتْ قُلُوبُكُمَا ۖ وَإِن تَظَاهَرَا عَلَيْهِ فَإِنَّ اللَّهَ هُوَ مَوْلَاهُ وَجِبْرِيلُ وَصَالِحُ الْمُؤْمِنِينَ ۖ وَالْمَلَائِكَةُ بَعْدَ ذَٰلِكَ ظَهِيرٌ )

التحريم (4) At-Tahrim

Idan kũ biyu kuka tũba zuwa ga Allah, to, haƙĩƙa zukãtanku sun karkata. Kuma idan kun taimaki jũna a kansa to, lalle Allah Shĩ ne Mataimakinsa, da Jibrĩlu da sãlihan mũminai. Kuma malã’iku a bãyan wancan, mataimaka ne.

( عَسَىٰ رَبُّهُ إِن طَلَّقَكُنَّ أَن يُبْدِلَهُ أَزْوَاجًا خَيْرًا مِّنكُنَّ مُسْلِمَاتٍ مُّؤْمِنَاتٍ قَانِتَاتٍ تَائِبَاتٍ عَابِدَاتٍ سَائِحَاتٍ ثَيِّبَاتٍ وَأَبْكَارًا )

التحريم (5) At-Tahrim

Mai yiwuwa ne Ubangijinsa, idan ya sake ku, Ya musanya masa waɗansu mãtan aure mafiya alhẽri daga gare ku, Musulmai mũminai mãsu tawãli’u, mãsu tũba, mãsu ibãda, mãsu, azumi, zawarõri da ‘yammãta.

Sai Kuma gargadi ya biyo baya:

( يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَّا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ )

التحريم (6) At-Tahrim

Yã kũ waɗanda suka yi ĩmãni! Ku kãre wa kanku (da iyãlinku wata wuta makãmashinta mutãne da duwãtsu ne. A kanta akwai waɗansu malã’iku mãsu kauri, mãsu ƙarfi. Bã su sãɓã wa Allah ga abin da Ya umurce su, kuma sunã aikata abin da ake umunin su

Wannan kenan

Haka Kuma dai ya tabbata cewar Sunnah ce mai karfi Miji ya kwana 7 a dakin amarya daga ranar da ya auro ta ita Kuma bazawara kwana 3 ne

Don haka anan abinda aka fi so shine, bayan sati guda dincan Mijin ya Kamanta Adalci idan ya kwana daya a dakin uwargida to sai ya kwana 1 a dakin amarya don gudun jayayya wanda ka iya haifar da gaba a tsakaninsu

Idan kuma amarya ta tafi anguwane kuma sunyi dashi zata kwana can kuma sai wani dalilin yasa ta dawo to amaryar zata haƙura ne da wannan daren tunda baa yi tunanin dawowarta ba. Haka kuma idan akasamu akasi ya kwana a dakin amarya sai kuma ya bayya na ba ranar girkin ta ba ne to ya kamata yayi adalci ya biya uwargida kwanan da aka sadaukarwa da amaryar

Don haka idan miji ya kwana a dakin wadda yaga dama to anan wata Sunnah ce ta musamman ya raya. Saidai Kuma baace ya wuce makadi da rawa ba. Yace zai fifita amarya akan uwargida domin kuwa ana jiye masa tsoron kada ranar Lahira ya tashi da cutar barin jiki (Paralyzed) saboda rashin adalcin da yake nunawa a tsakaninsu

Irin wadannan matsalolin duk mun wuce babinsu a cikin karatun da muke ONLINE a sabuwar MU’AMALAR AURATAYYA A MUSULUNCI. Ga wanda yake son shiga zai iya yimin magana ta Priɓate sai a turo masa dokoki da tsare tsaren makarantar

(07035387476)

Wallahu taala aalam

 Subhanakallahumma wabi hamdika ash-hadu anla’ilaha illa anta astaghfiruka wa’atubi ilayk

Amsawa:

Usman Danliti Mato (Usmannoor_Assalafy)

Zauren Fatawoyi Bisa Alkur’ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.